Hnamdang rawn lut an pung thut ILP check post nawrtute ringhlel

Mizoramah inner line permit lak ngai hnamdang (Vai) rawn lut an pung deuh thut a, August 18 bikah khan mi 500 chuang hnenah ILP pek a ni.August 18 zan khan Vairengte Police ILP Check Post-ah lirthei hmangin hnamdang (Vai) mipa engemawzat Mizorama rawn luh tum an awm a, police-in ILP lak tir tuma an inhnawh tawt deuh chu heng mi zinga thenkhat hian India ram chhung tho a nih avanga permit lak ngaia tihkhawtlai an ni chu hrethiam loin reilote chhung an innawr buai a, boruak erawh a dai zui leh mai nia thu dawn a ni.
Heng mite hi central armed police force (BSF, CISF, CRPF adt) Mizorama lak tura rawn intlar tum niin an insawi a. Assam leh Tripura atanga rawn kal an ni ber.
Mizo Zirlai Pawl chuan August 18 zana hnamdang Mizoram luh tumten Vairengte ILP Check Post-a buaina an siam chu an duh lo takzet a, Vai lo luh tumte hi nidang aia tam fe an nih avangin an ngaih a tha loa, Assam sawrkarin dan loa India rama lut Bangladesh mi hnawhchhuah an kalpui avangin Mizoramah Vai an tam taah an ngai tih an sawi.
MZP Gen. Hqrs. thuchhuak chuan, August thla chhungin mi 2573 hnenah ILP pek niin August 18 khan mi 544 hnena pek a ni a. August bika ILP pek hi chawhrualin ni khatah mi 140 vel zel a nih laiin, August 18 bika mi 544 an lo lut thut chu ngaih a tha lo tih a sawi.
MZP Hqrs, Sub-Hqrs leh Branch pawh August 19 atang hian ILP pek chhuahnaah a theih ang anga duty-te tawiawm turin an inhrilh tih a sawi a ni.
Thawhlehni khan MZP chuan Home minister K Sapdanga chu Thawhtanni zana thil thleng hi sawipuiin, Assam-in dan loa an rama awmte an hnawhchhuah mek hi Mizoram-in a tawrh theih avangin ramri-ah sipai leh police tam zawk duty dah tur leh Assam atanga lo lut turte uluk taka an document check tura an duh thu an thlen a. CAPF lak chhuanlama dan loa Vai an lo luh lohnan theihtawpa inven a tul thu an thlen. Home minister hian theihtawp chhuah a tum thu leh duty pawh an uluk thu a lo hrilh a ni.
‘Assam sawrkarin Bangladesh mi dan loa awmte a hnawhchhuah avanga Mizorama lo lut an awm chuan an chungah eng pawh thleng se MZP chuan mawh a phur dawn loa, a rang thei ang bera inthiarfihlim turin a hriattir. Mizorama hnamdang Vai awmte pawh Bangladesh atanga lo lut an awm leh awm loh a rang thei ang bera dap chhuak turin MZP chuan Mizoram sawrkar a ngen a ni,’ a ti.