Hnehna nen NT Lalbiakima a lo kir

Hun rei tak inhnek lova a chawlh vang vang hnuin ‘Zokeite’ NT Lalbiakkima chu inhnek turin a kir a, inrinni zana a khingpui Nepal boxer tha Lal Prasad Upreti a hneh a, hnehna nen a lo kir leh ta.
NT Lalbiakkima leh Lal Prasad Upreti te hi Expolnn Suites & Convention, Greater Noida-ah an inhnek a, an inhnehtawk hle. Pumrua lian leh sang zawk ni mah se Nt-a lakah Upreti duh angin a inlan thei bik lo. Upreti-a khan ban sei zawk a nih hre ranin NT-a a hmachhawn a, a chan pawh a tha ve lek lek thin. Fimkhur taka inveng chungin Zokeite a hmachhawn.
Fimkhur taka inlan Upreti hi NT-a’n chak ngei tumin a nawr char char a, thisen chhuak khawp hiala tangin a khingpui a hnaih chilh zel a, a thawkrim leh huaisen zawk a nih a chhawr tangkai a, hnehna hlu tak a sualchhuak. Inhnek hmuhnawm takah NT Lalbiakkima hian Lal Prasad Upreti hi 39-37, 39-37, 39-37 in a hneh.
Mizo boxer lar NT-a hian June 2022 khan World Trade Centre, Dubai-ah Jayson Vayson chu hmachhawnin, WBC Asian Continental title an inchuh a, lightflyweight kawnghren inchuhnaah Philippines boxer lakah a chak zo lo.
Vayson laka a tlawm hnu December 2023 khan NT-a hian a nupui Lalrinchhani a sun. A nupuiin a boralsan hnu hian chhiatna dang a tawk zui leh a, kawng engkima amah buaipuitu Dr. Lalmuanpuia leh a nu Lalthanpuii te a chân zui leh a, hemi hma hian a pa NT Zomawia chuan a lo boralsan tawh bawk.
Harsatna leh hun thimin a tlakbuak hnuin ring chhungah a lo kir leh a, phu taka hnehna changin hlim ni a tawng ve leh ta nge nge!