Hnehna nena bul tan Swiatek

Hnehna nena bul tan Swiatek
French Open hmeichhe singles title a kawl lai humhim tura a chetchhuah vawi-khatnaah top seed Iga Swiatek chuan Thawhlehni khan 6-4, 6-0-a Spain nula Cristina Bucsa sawp chungin second round a lut.
Kum li chhunga French Open title pathum lak tlin tuma bul tan Pole hian Philippe-Chatrier court-ah darkar khat khel tling loin a tumpui a tuk-dawl hman a, mahse, kumin Australian Open-a game khat chiah a hloh ang kha chu Paris-ah hian a pha lo nghal phawt a, chawlhkar hnih kalta Italian Open quarter-final match pakhata malpui na avanga a inhnuhdawhna hliam kha dam tawh mah se ngai a la awh zan lo a ni mai thei.
World number one Iga Swiatek hian WTA ranking-a a sang ber nihna chawlhkar 61 luah tling chiahin, world number 70 Bucsa laka a result hlawhchhuah hi mi rin lawksa ve reng a ni a, nizan result tarlan hman lohah American Claire Liu hmachhawn zui lehin, second round pawh hi harsatna lian tawk loa paltlang zui leh tura ngaih a ni.
Kum 21 mi Pole hi tuntumah a champion leh thei a nih chuan Roland Garros-a title vawithum la thei Serena Williams leh Monica Seles-te hnung a zui ve chiah dawn a, mahse, Swiatek hian chutiang record lam a tuipui lem loh thu sawi chungin, “Tennis ka khel mai a, statistics leh history lamah expert ka ni hran lo a, chuti lam chu ka insawrbingna pawh a ni lo.
“Serena emaw Monica Seles emaw ka hmachhawn lo a, ka hringnun bil leh ka zinkawng bik hi ka zawh mawp mawp mai a ni,” a ti.
Nizan result tarlan hman loh dangah top-10 seed luahtu dang pathum – Ons Jabeur of Tunisia, Kazakh Elena Rybakina leh American Coco Gauff-te pawh an chechhuak ve bawk.
Nilaini French Open 2023 hmeichhe singles result lamah kirleh ila.
Tualchhung nula Caroline Garcia chu he thu buatsaih lai thlenga tla tawh zinga hmeichhe ranking nei sang ber niin, fifth seed Garcia hi second-round inkhel pakhatah Russian Anna Blinkova chuan 4-6 6-3 7-5-in a hneh a, French nula Garcia hi women’s draw-a seed chang pha zinga tla tawh 16-na a ni.
Paris-a champion tawh Jelena Ostapenko pawh tournament debutant Peyton Stearns lakah a tlawm ringawt ve bawk.
Latvian 17th seed Ostapenko hi Roland Garros-a 2017 champion kha niin, Stearns lakah hian rinkai zawk ni mah se nikum US Open-a major debut a nghahchhuah hnua tuipui rala grand slam tournament khel tan ve chiah American kum 21 mi lakah 6-3 1-6 6-2 -in a tlawm.
Stearns hian first round lamah pawh Her first-round victory over doubles world number one Katerina Si-niakova a lo hneh tawh a, kha kha grand slam match-a a chak vawikhatna chiah a ni.
Third round a tum leh tur Russian ninth seed Daria Kasatkina chuan second round inkhel dangah 6-3 6-4-in Marketa Vondrousova a paltlang ve bawk.
Second seed Aryna Saba-lenka pawhin hlauhawm pumpelhin qualifier Iryna Shymanovich lakah straight-set hnehna a chang.
Australian Open champion Sabalenka hian a chipui Bela-rusian Shymanovich laka 7-5 6-2 hnehna changin, Poland mi Magdalena Frech leh Russian Kamilla Rakhimova inkhela chak zawk a tum leh ang.
Second round inkhel dangah American third seed Jessica Pegula chu hahdam zawkin a tlang thung a, Camila Giorgi laka 6-2-a set khatna a lak hnuah a tumpui Italian hi hliam avangin a inhnukdawk a, 6-3 7-6 (7-3)-a Colombian Camila Osorio hnehtu Belgian 28th seed Elise Mertens nen an insu zui leh ang.
Pegula chipui Sloane Stephens pawhin round thumnaa Kazakhstan nula Yulia Putintseva hmachhawn thei turin Russian Varvara Gracheva lakah 6-2 6-1 hnehna nuamsa a chang.
Ukraine star Elina Svitolina pawhin set hmasa ber hloh zet chungin Australian Storm Hunter lakah 2-6 6-3 6-1 hnehna a sualchhuak.
French Open quarter-final vawithum khel tawh Svitolina hian nikum October thla khan fa a hring a, tun hi nu a nih hnua grand slam a khelh leh vawikhatna niin, Blinkova a su leh ang.
Thawhlehni khan Svitolina hian a pasal leh French player ni bawk Gael Monfils-a inkhel a tawiawm a, Nilainiah hnehna a chang zu ve leh a ni.