Hockey team tha 2 hnehtu India

Hockey team tha 2 hnehtu India
FIH Pro-League hockey kal mekah Pathianni khan India chuan Rourkela khuaa an mikhual Australia chu 5-4-a hneh lehin, Zirtawpni mai khan world champion lai Germany lakah pawh 3-2 hnehna an chang hlimhlawt tawh bawk!
Birsa Munda Stadium in-khelah captain Harmanpreet Singh chuan minute 13, 14 leh 55-naah India atan goal khungin, a hat-trick siamna hi penalty corner vek a ni.
World Cup hnuhnungbera palina Australia hian goal vawlut hmasain, tan atanga minute hnihna lekah Joshua Beltz chuan field goal a thun er zawk a, mahse, home team hian first quarter tawpah 2-1-in hma an hruai hman thung.
Si an phurh thuai hnuah Indian team insiamtha zui nghalin, minute 17-ah Jugraj Singh chuan penalty stroke hmangin an siphurh a sut a; minute 25-ah Selvam Karthi chuan field goal khung ve lehin, half time-ah India hian 4-1-in hma an hruai hman.
Mualneitu team-in third quarter lama goal an thun belh zawh loh laiin Australia tan minute 42-ah Ky Willott chuan a vawlut a; minute 52 leh 56-ah inhnaih takin Ben Staines leh Aran Zalewski-te’n khung belhin, fourth quarter-a goal thum lut zingah Harmanpreet-a hat-trick siamna goal a tel.
Team pahnih hian penalty corner vawi 10 ve ve hlawh-chhuakin, India-in vawithum an tilut a, Australia-in tum hnih goal-ah an chantir thung.
Australia hian kumin January thla khan India leilungah mipa field hockey world cup an rawn khel a, tuntum hian Bhubane-swar tournament-a an hruai loh player engngemawzat squad-ah an rawn telh thar a, an player 20 rawn hruai zinga pariat hi in-ternational match 10 leh a hnuai lam la khel chauh an ni.
India pawhin pre-quarter-final-a an tlakna kumin World Cup squad-a an player pariat kha squad tharah an telh lo a, chu’ng zingah chuan senior player rualkhat – Akashdeep Singh, Mandeep Singh, Amit Rohidas leh Nilakanta Sharma an tel a, nupui neih vangin goalkeeper Krishan Pathak pawhin squad a la zawm lo.
Pathianni game kha FIH Hockey Pro League 2022-23 season kal meka match ruk an khelh tawha India vawili chak-na niin, nimin result tarlan hman loh second leg match-ah Ger-many an tum leh a, Nilaini hian an hneh tawh hnu pakhat zawk Australia an su leh ang.
India 3-2 Germany
Zirtawpni FIH Pro League-a reigning world champion hneh thu hi han luhchilh leh lawk ila.
Striker Sukhjeet Singh chuan Rourkela khaw inkhelah field goal hnih thunin, kum 26 mi hi January thla World Cup pre-quarterfinal paltlang zo loa a thlengtu team mualpho tuma India player zingah khan telin, Germany hnehna kawngah kartawp khan a thawhhlawk.
Birsa Munda Stadium-ah he match khelh laia tournament top-scorer pakhat zawk ni chunga inlan Harmanpreet Singh chuan India tan goal khat a thawh ve bawk.
Minute 42-a India-in sithum faia hma an hruai hnu hian Germany tan Paul-Philipp Kaufmann leh Michel Struthoff-te’n an siphurh sut then ve bawk mah se penalty corner an hmuh thenkhat goal-a an chantir zawh tlat loh avangin German-hoin an siphurh an sut zo thei lo.
World Cup-winning team hian penalty corner vawiruk thaiin, India hian vawili an hmu ve bawk.
Indian men’s hockey team head coach thar atana ruat fel tawh South Africa men’s field hockey international hlui leh Ireland men’s national field hockey team coach hna lo chelh tawh bawk Craig Fulton chuan a team thar a la zawm hman lo a; Australian Graham Reid chhuah hnuah India high performance director hlui David John leh ex-junior India coach BJ Kariappa-te khan South African inpeihchhuah hma atan Pro League March leg-ah hian India mipa hockey team an kaihruai rih a ni.