Thawhtanni khan an tumpui ve ve
hnehin India leilunga FIH Men’s
Hockey World Cup khelh mekah Germany leh South Korea chuan quarter-final an chuangkai.
Germany hian last eight stage lut turin France lakah 5-1 hnehna a chang a; South Korea hian penalty shootout hmangin 2016 Olympic champion Argentina an paltlang ve bawk.
-- Advertisement --
Pool B lama pathumna South Korean-ho hian Kalinga Stadium-ah Argentina hmachhawnin, hun pang-ngaiah South American team nen hian 5-5-in an inhnehtawk a, penalty thaiah 3-2-in an vannei ta zawk a ni.
Asian ram zinga mipa hockey world cup quarter-final lut awmchhun South Korea hian vawiin quarter-final match pakhatah Pool C toppers Netherlands an tum leh ang a; last eight lut zo ta lo Argentina chuan January ni 26, naktuk, Ningani hian Rourkela khawpuia 9-na atanga 16-na luahtu tihchianna inkhel pakhatah Chile an khel thung ang.
Thawhtanni inkhel danga France sawptu Germany hian defending champion Belgium hnungah an pool-a pahnihna luahin, vawiin quarter-final match dangah Pool D toppers England nen semi-final luh an inchuh dawn a ni.
France hian naktukah Pool D mawngphah luahtu Wales an khel ve bawk ang.
Pathianni daih tawh khan tournament thlengtu India chu New Zealand lakah tlawmin Hockey World Cup trophy beiseina an thlahliam.
Kum 48 hnua an Wold Cup medal hmasaber tur an beisei lehna kawngah India hian tualchhung fans 15000 pungkhawm hmaah hneh ngei ngei ngai New Zealand an hmachhawn a, Bhubaneswar khawpuia Kalinga Stadium chhung khat vek Indian supporter puihna pawhin a thlengtu team tlawm tur hi a chhan zo lo a, hun pangngaia 3-3 a nih hnu penalty shootout-ah an vanduai zui ta a ni.
Captain Harmanpreet Singh chuan sudden death-ah India chakpui turin ‘golden chance’ hmu bawk mah se ‘target’ a pum thelh!
Veteran goalkeeper PR Sreejesh pawhin shootout lamah ‘save’ vawihnih lai nei mah se a team tlawm tur a chhan zo ta bik chuang lo.
Hun pangngaiah India hian penalty corner tum 11 zet hlawhchhuak mah se vawihnih chiah penalty corner hmu an tumpuite lakah hakpui thamin an hun tha hmuh an hmangtangkai zo lo.
Nizan khan last eight stage-ah Spain leh title hawn thei tura rinkai, Pool A toppers ni bawk Australia an intuma, result tarlan hman a ni lo.