Australian Open-a Indian kan hmuh tlemte zinga mi Rohan Bopanna leh Sania Mirza inkawp chu Thawhlehni zan khan quarter-final match khel tur an nih laiin last 8 stage-ah hian an tumpui tur Latvian-Spanish pair Jelena Ostapenko leh David Vega Hernandez tangdun an inlan lo a, walkover hmanga hnehna changin mixed doubles semi-final an lut a, quarter-final inkhel danga third seeds Desirae Krawczyk-Neal Skupski leh Taylor Townsend-Jamie Murray inkhela chak zawk zawk an hmachhawn leh ang.
-- Advertisement --
Indian pair hian tournament kal laiah set an la hloh lo a, Thawhtanni zan khan second round lamah Uruguay-Japanese pair Ariel Behar leh Makoto Ninomiya chu 6-4, 7-6(11-9)-in an lo hneh tawh a ni.
Kumin Australian Open hi kum 36 mi Sania tan a Grand Slam khelh tawpna a ni ve tawh dawn a; Grand Slam doubles title paruk la tawh hian February ni 19 atanga khelh tan tur WTA 1000 Dubai Tennis Cham-pionships a khel leh zet ang a, chumi zawh lamah chuan tennis inelna hrim hrim chawlhsan ve tawh a tum.
Aus Open women’s doubles lamah pawh Sania hi Kazakhistan player Anna Danilina nen inkawpin an chhuak a; Pathianni khan second round-ah Belgium mi Alison Van Uytvanck leh Ukraine nula Anhelina Kalinina inkawp lakah 4-6, 6-4, 2-6-in an lo tlawm fel tawh a ni.
Bopanna pawh hi Mathew Ebden nen inkawpin men’s doubles first round-ah an tla fel ve tawh bawk.