Honduras in Taiwan hnawlin China pawm

Pathianni khan China leh Honduras te chuan diplomatic lama inzawmna nei tan ta in Taiwan chuan Beijing chu ‘tawktar leh nawrluihna’ kalpuia a thian ram te chhuhsak zel tumah a puh nghal.
China in Honduras nena inzawmna an neih tak a sawi hma lawk hian Tegucigalpi chuan Taipei nena an inzawmna a thatloh thu a sawi thung a.
“Sorkar pahnih te chuan ambassadorial level ah diplomatic lama inawmna neih an remti a ni” tiin China foreign ministry thuchhuah chuan a tarlang.
Tihian Taiwan in khawvel ram dang te nena inzawmna a neihpui chu ram 13 chauh an ni ta a, tun hnaiah Latin America lama a zawlpui ram te a chan ta pheuh pheuh a.
China chuan mahni a inrelbawl ram democratic Taiwan chu a ram bung anga a ngaih niin a tul a nih chuan tharum pawha la lak mai tur a tih reng a ni a. ‘One China’ policy a kalpuina hnuaiah khawvel ram dang te chu Beijing leh Taipei te pawm ve ve a remti lo a ni.
Beijing-ah Honduran Foreign Minister Enrique Reina leh Chinese counterpart Qin Gang te chuan inremna ziakin thuchuah intawm an siam zui a. “China chuan Honduran Presidnet Xiomara Castro chu a hma thei ang bera China tlawh turin a sawm a ni” tiin tarlan a ni.
A hma in Reina chuan Castro thupek angin Taiwan hnenah diplomatic lama an inzawmna chhutchah a nih thu a hrilh thu a sawi a.
“Republic of Honsuras chuan khawvelah China pakhat chauh a pawm a, chu chu People’s Republic of China a ni a, China tinte aiawh tu a ni” tiin a sawi zui a. “Taiwan hi Chinese territory lakhran theihloh a ni” a ti zui bawk.
Taiwan president Tsai Ing-wen chuan China chuan Taipei allies te chu nawrluihna leh vauna nen a thlem char char tiin a sawi a. “International lamah Cina hian Taiwan rahbeh a tum a, chu chuan regional peace leh stability a tibuai” tiin a sawi bawk.
Beijing thung chuan Taiwan sorkar in indepedence leh inlakhranna lam a sawi leh tih tum hi a duh lo takzte a ti ve thung a.
Taiwan Foreign Minister Joseph Wu chuan Honduras in an inzawmna a tihchiat theihna chhan chu China in sum lama puih a intiam vang tiin a sawi a. “Honduras nena inbiakna kan neih hnuah pawh awmzia a nei thei lo va, kan project tin te titawpin kan embassy pawh kan khar zui nghal ang” tiin a sawi.
Wu chuan Taiwan chu mahni inrelbawl ram a ni tia sawi bawkin, “Chinese authoritarian sorkar lakah hian kan bawkkhup dawn lo va, kan zalenna leh democracy kan tungding zel ang” tiin a sawi bawk.
Thla hmasa lam khan Reina chuan an ramin China pawm thutlukna an siam chhan chu sum lama harstan vang a nih thu sawiin Taiwan chu sum lama apuihna tipung tur leh Taipeilaka an leiba $600 million chu siamtha tura a ngen thu a sawi a. Wu pawhin Castro sorkar chuan Taipei lakah US dollar billion tel puihna a ngiat tiin a sawi.
Honduras hi ram rethei tak niin a ram mipui maktaduai 10 vela 74% vel zette chu rethei bakberha awm an ni a. Tegucigalpa hian China pawm a thlanna chhan hi China in hydrolectric dam siamsak a intiam vang nia sawi a ni bawk.
Latin America ram hrim hrim te chu kum 1949 civil war hnua China leh Taiwan tena diplomatic lama an inchuh reng a ni a. Tun hnai lawkah Nicaragua, El Salvador, Panama, Dominican Republic leh Costa Rica te pawhin Beijing zawk an pawm ta bawk a. Guatemala leh Belize te chauh chu Taipei nena inzawmna la nei chhun an ni.