Horticulture hnuaia hmalakna hmuhpuiin Central Team lokal

Sawrkar laipui Ministry of Agriculture & Farmers Welfare atangin Mizoram Horticulture department hmalakna hmuhpui turin June 11- 14 chhung khan Central Team an lokal a, Serchhip Zawlpui, Bamboo Processing Centre Sairang leh Zo-Anthurium Growers Co-operative Society (ZAGCS) Collection Centre Ramhlun North an tlawh.
Ningani khan Horticulture minister Prof. Lalnilawma hoin department hotute leh Horticulture hnuaia stakeholder-te nen an thukhawm a. District hrang hrang leh Centre of Excellence (CoE) Thingdawl leh Lungleia hmalakna chu powerpoint hmanga hrilhfiah a ni a. Horticulture hnuaia stakeholder hrang hrang hnen atangin an hmalakna thlir ho a ni bawk.
Horticulture minister chuan Central Team-in an tawnhriat atangin kan ram mil leh mamawh an zirchhuah ngei a ring tih a sawi. Tuna department-in scheme a kalpui mek bakah hmasawn lehzual nan puih an ngaihna laiah pui a, hmasawnna atan tanho a tul tih a sawi.
Thlai sawngbawl lamah hma lakpui a, ram pawna thawn chhuah tur sawngbawl leh rei zawk dahthat theih dan thiamna kan mamawh tiin, horticulture hmalakna zingah maua kan hausakna hmang tangkai a, resource mapping nei tura hma lak a tul tih a sawi bawk.
Ministry of Agriculture additional commissioner Dr Naveen Kumar Patle chuan, central-a policy duangtu an ni a, a chhawrtute nen hun hman fo a tul a, heng atang hian sawrkar policy thar duan a fuh ber tih a sawi. Tuna India rama Cluster Horticulture Development hmalakna kal mekah Mizoram a tel ve thei tih sawiin, anthurium cluster, dragon fruit cluster leh serthlum cluster tih a chakawm thu a sawi
Mizoram chu dragon fruit ching zingah a rah a tui bik tih Dr Patle hian a sawi a. India ram pum huapa dragon fruit conference chu Mizorama nghah ni thei se, tiin chutiang tur chuan hmalak a rawt a ni.
Central Team hian Nilaini khan Centre of Excellence for Vegetable hmun tur Mat kam, Serchhip district tlawhin Mat Zawlpui zaua huan siamtute nen an huan hmunah an inkawm a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More