CM-in US-ah Mizo Day hmanpui “Hnam tobul chhui tur din kan tum”

Mizo Society of America bultumin Maryland state USA-ah Mizo Day 2024 hman a ni a. Hmanpuitu chief minister Lalduhoma chuan an sawrkarin Zo hnam tobul chhuitu tur din an tum tih a sawi.
US Eastern time zone-a September 2-a Rockville, Maryland-a Mizo Day hmannaah Lalduhoma chuan, kum 2010-ah khatihlaia chief minister Pu Lal Thanhawla te nupa in Mizo Day hi an lo hmanpui tawh a, a ni pawh kum 2020-a hmanpui tura sawm a nih laiin, Covid leng vangin Aizawl atanga online-a a chhim tak thu a sawi. Kuminah amah ngei kala a tel thei ta chu a lawm hle tih a sawi bawk.
Khawvel puma Zofaten inunauna leh inpumkhatna nghet zawk kan neih theihna tur thinlung pu chunga he Day hi hmang turin chief minister hian a chah a. Lushai, Kuki, Chin tihte chu kan pianpui hnam hming (generic name) niloin, hnamdangin min kohna mai a ni tih hmanlaia Zofate chanchin ziaktute thu ziah danah a chiang tih a sawi.
“A tirah heng hming hi keimahni pawhin kan pu ngai loa, a lo rei hnuah lungawi takin kan pu ta mai niin a lang. Record hlui atang chuan ‘Zo’ tih hi kan zavaia kan pianpui hnam hming – generic name chu niin a lang. Kan tawngkamah pawh Zo tuithiang, Zo thlifim, Zo ar, Zo vawk adt. kan ti thin,” a ti.
Zoram People’s Movement pawh Mizoram Peoples Movement tiloin ZPM tih a ni a. An hruaituten hmathlir thui tak neiin Mizoram niloin, Zoram People’s Movement party tia a hming sa an ni tih a sawi.
“Vawiinah hian rawtna ka siam loa, kei aia mithiam zawk, facility nei tha zawkte cho chhuah ka tum mai a ni. Nomenclature hi inbarhluih (impose) chi a ni lo a. Nakinah chuan kan zavaia kan pawm tlan theih hnam hming min huapzo a lo la pian erawh ka beisei tlat a ni,” Lalduhoma hian a ti. ZPM sawrkar chuan Zofate hnam tobul chhuitu tur din a tum mek tih a sawi bawk.
British-in tihluihnaa min awp hnu, kum 132 kal tawh, 1892 January 29 khan Fort William Calcutta-ah kan hnam kal zel dan tur relin Chin- Lushai Conference an neihah Vaiho emaw, Kawlho emaw nen hnam hrang, inang lo kan nih avangin, a hranga rorelna pakhat, Commissioner of Assam hnuaia min dah vek an tum a. Inkalpawhna kawngpui siam phawt nise, tiin, hei hi a puitling zel ta loa. Tunah chuan India, Burma leh Bangladesh-ah kan inthen darh zo ta rih tih Mizoram chief minister hian a sawi.
Hlado chham thin, inthawi thin, puithiam nei, thiam hla nei, mitthi phum thin, pialral ngaihdan nei, thawnthu inang, lal nei thin, Kut hmang thin, inneihnaah hmeichhe man nei, dawhkanga in sa, lungthu pathum nei, meilam sat thin, mi lu la thin, hlo thlawhnaa inlawm thin hnam khat kan ni, tiin, “Kum 1988-a Zoro Movement khan a tum chu Zo-Reunification within India a ni a.India, Burma leh Bangladesh-a awm Zofate zawng zawng hian, India hnuaia rorelna pakhat hnuaia awm zai kan rel ve thei ang em le,” a ti.
Tunlai geo-politics inlumlet mek ngun taka bih chuan, hnama min siamtu Khuanu hian hmun khata kan awmho theihna tur kawng min hawnsak dawn em ni a tih theih tih a sawi a ni.