Hrem hmabak Dani Alves

Hrem hmabak Dani Alves
Pawngsual thubuai rit leh mang-anthlak zetin a bawh mek Brazil leh Barcelona footballer hlui Dani Alves-a thubuai chu Barcelona court-ah tunkar chhung khan ngaihtuah zawh a ni ta a, thutlukna nghah mek a ni.
Tarlan tawh thin angin, hmeichhe pakhatin Alves hi Barcelona khaw nightclub pakhata VIP toilet-ah thlemlutin a pawngsual niin a puh a; Brazilian hian a tir lam khan TV interview-ah pawng-suala puhtu chu a hrriat loh thu sawi zetin, a hnuah sex chu a hmanpui ngei a, mahse, an pahnih duhthu ngeia chesual an nih thu a sawi a, chu chu court trial-ah pawh a dinna a ni hlen ta a ni.
Kum 40 mi hi nikum January thla daih tawh khan manin, bail-a chhuah dilna thehlut fo mah se Brazil rama a thlawh haw palh hlauhthawn thilah hnawlsak a ni zel a; tunkar Thawhtanni atanga a chungchang ngaihtuah tur tih pawh chu inbuatsaihna hun la mamawh belh chhuanlamin sawnhlat a dil a, chu pawh chu phalsak a nih loh avangin a chungchang ngaihtuahna chu Nilaini khan an zo fel a, tunah chuan court thutlukna nghakin lung in lamah an nawrliam leh tawh a, a puhtute leh thuhretute tanfung enin jail chaw a la ei belh nual rin a ni!
Barcelona court-ah hian minute 20 chhung Alves hian a thiamthu a sawi a, tah chuan tharum thawh chi a nih loh avang leh awmkhauh zawk nihna behchhana hmeichhe khawih mi a ni lo tih court hrilhin, duh se la chuan pawng-suala puhtu hmeichhia khan an chet-sualna hmun toilet kha a tlanchhuahsan thei niin tanfung a siam.
Spain ramah hian pawngsual case-a thiamloh changte hi kum li atanga kum 15 thleng lung in tang thei an ni a, pawngsual tawktu nia insawi hmeichhe ukil rawihte chuan South American hi kum kua tal tang turin court hi an ngen a ni.
Alves chuan amah puhtu chu tlanchhuak thei a nih thu sawi chungin eng lai maha toilet chhuahsan a dil loh thu a sawi a; kut thlak anga puhna a pha hul thak bawk.
Lehlam pawl ukil-te chuan Alves leh a thianpain nightclub-ah chuan hmeichhe la naupang tak tak pathum tana zu (champagne) an leisak thu leh hmeichhe pakhat chu toilet-a thlemluh leh hmeichhia hian chhuah a ngen pawhin tharum hmanga danbeh tlat a nih thu leh pawngsual a nih zui tak thu court hi a hma pawhin an lo hrilh tawh a ni.
Thawhlehni khan Alves-a thianpa chuan court hnenah nightclub an luh hma khan a thianpa chuan kai thawkhatna tham zu a lo lem tawhsa thu a hrilh.
A pasal mualpho hnua inthen tura thutlukna siam ta Joana Sanz, kum 31 mi pawhin kha mi zan khan a pasal lo haw chu Barcelona khawpuia an chenna inah a rawn rui haw hle tih court hrilh ve bawkin, inchhung bungruate pawh a paltlu nual a, khumah a chatthla zui ta niin a sawi.
Kha mi zana pawngsual tawk nia insawi thiannu pakhat pawhin tap chungin court hnenah thil thlen dan thenkhat a hrilh a, toilet atanga an thiannu lo chhuak chu thlem ruallohin a tap nasa a, Alves chuan a hliam na takzet a ni tiin a sawi ve bawk.
Tarlan tawh angin, he case-a Alves hlin tumtu ukil (public prosecutor) chuan kumkaw lung in tan bakah hmeichhe rilru thawidamna atan Brazilian hi euro 150,000 (£128,000) chawi turin court a ngen bawk.
Nikum January thlaa an man kha August thlaah pawngsual thubuai an awrhtir a, a hnuah court chuan evidence hrang hrang an zirchian hnuah trial kalpui tlakah an pawm a, Paris St Germain player hlui chu court thutlukna nghakin a tanna ngaiah a kirleh ta a ni.