Hriin a tihbuaia chuang Indian pahnih him zel rih

MV Hondius-a chuang Indian pahnih chu natna lan chhuahna nei lo leh hrisel tha tak an nih thu Spain-a Indian embassy chuan Pathianni khan a sawi.
Indian pahnihte hi hantavirus kai awmna lawngah hian thawktu zinga mi an ni a, Netherlands-ah sawn chhuah an ni tawh a, himna dan zam angin khung hran an ni dawn tih embassy thuchhuah chuan a tar lang.
“Ambassador chuan Spanish thuneitute leh Indian (crew member) pahnihte nen an innbepawp tha a, Indian-te hriselna leh himna tur ngaihtuahin thil awm dan hi a enfiah zel a ni,” tiin thuchhuah chuan a tar lang bawk.
Hetihlai hian France chuan hantavirus leng vanga cruise ship-a chuang, an ram mi passenger panga zinga pakhat chuan Pathiannia hruai haw tura thlawhnaa an kal laiin natna lang chhuak a nei tih a sawi.
French Prime Minister Sebastien Lecornu-a chuan X-ah, “An zinga pakhat chuan hruai hawna thlawhnaah natna lang chhuak a nei a, heng passenger pangate hi hriattirna dang a awm hma chuan khauh taka khung hrannaah dah nghal an ni,” tiin a tar lang.
“Damdawi lama hma lak mek a ni a, endik leh medical check-up an nei dawn a ni,” a ti bawk.
Pathianni khan hantavirus-in a tihbuai cruise ship-a chuang zinga mite chu lawnglenga hruai chhuah an ni a, ram hrang hrangte chuan an mite chu anmahni ram theuhvah thlawhna bik ruahmanin an hruai haw a. Cruise ship MV Hondius-ah hri darh ang chi hi zun leh ek hmanga darh a ni a, mihring inkarah a kai tam lo hle.
Dutch flag vuah MV Hondius hi Pathianni zing khan Tenerife-a lawng chawlhna tenau, Granadilla-ah a thleng a. Spanish health ministry chuan a chuang mi 140 velah hri kai an awm lo tih an sawi.
WHO Director-General Tedros Adhanom Ghebreyesus-a chuan hri leng chungchangah mipui nawlpui tan lungkham tur a awm lo tih a sawi nawn leh a. “Hei hi COVID dang a ni lo va, mipui tan a hlauhawm a tlem a. Chuvangin, hlauthawng tur an ni lo,” a ti.