Hrileng a zia, ni 24 chhung +ve thar awm lo

Vanneihthlak takin Mizoramah Covid-19 hrileng
a zia deuh deuh a, thla hmasa lam nena khaikhinin August thlaah hrileng hi a ziaawm hle. Tun hnai ni 24 chhungin hri vei hriat thar an awm tawh lo bawk.
IDSP te’n an chhinchhiah danin, August thlaa hri vei hriatchhuah thar zat chu pali a ni a, endik tur pawh a tlem, sample 12 endik a ni.
May leh June-ah hri hi a hluar a, vanneihthlak takin July leh August-ah chuan a tlahniam. Tun hnaiah phei chuan hri vei hriatchhuah thar an awm lo; August ni 8-ah khan mi pathumin an vei tih hriatchhuah a ni a, chumi hnuah chuan hriatchhuah thar an awm rih lo.
August ni 15 khan hri vei enkawl lai mi pali chu dam takin an chhuak a, hemi hnu hian Mizoramah hri vanga enkawl an awm rih lo. Endik ngai pawh an awm meuh rih lo a, August ni 25-a mi pakhat endik a nih hnuah endik ngai an awm rih lo.
Covid-19 hrileng hi nikum kum tawp lamah a zia a, nikum December ni 12 hnuah hri vei hriatchhuah thar an awm hnuah mi dang an awm lo vang vang a, kumin February ni 28-ah pakhat hriatchhuah a ni. Hri vei an awm leh zeuh zeuh a, May-ah a hluar hle; May mi 375-in hri an vei tih hriatchhuah a ni a, June-ah mi 116 hriatchhuah an ni. Tunah chuan a hniam zawngin a kal leh mek.