Hrileng vangin panga thi tawh

Hrileng vangin panga thi tawh
Lawngtlai district Kakichhuaha tui hri nia hriat leng mekah Nilaini zing khan pakhat a thi leh a, heti hian he hri avanga nunna chan hi mi panga an ni tawh.
Nilaini khan Lawngtlai district bawrhsap Donny Lalruatsanga leh senior chief medical officer Dr Lalmuanawma Jongte chuan hmalak dan tur an sawi dun a. Sr. CMO sawi danin, kumin November 4 atang khan he hri hi hriat tan a ni a. November 11 khan medical team-in Kakichhuah hi tlawhin, investigation kalpui a ni.
Tui sample lak a ni a, ZMC&H a endik tura lak a ni. A ral lehlam maia awm Salachhuah (Myarmar) atang a hri hi lo lutah an ngai a. Kum 5- 63 inkar endik atangin, tun dinhmunah he hri vei mi 27 an awm a, thalai lamah kai an tam zual. Rapid Response Team din a ni tawh a, health worker pakhatin a thutchilh mek.
Hmalakna tur sawi zingah, tui tihthianghlim, a veite enkawl hma, faina leh thianghlimna chak taka kalpui, tih a tel a. Kakichhuah leh Salachhuah inkalpawhna kawng chu khar lailawk nise, Kakichhuah hi kar khat chhung atan ‘containment area’ a puan nise, medical duty, election duty leh emergency thilah lo chuan tumah luh leh chhuah phal loh nise an ti. Damdawi tul ang ang rang taka pek a, hemi chhung hian senior CMO kaihhruaiin zirchian nise an ti.
Kakichhuaha tui hri nia hriat leng mek vanga nunna chan zinga pahnih hi Salachhuah (Myanmar) lam niin, pakhat hi Kakichhuah khua ami a ni a, a dang pahnih hi raltlan, Kakichhuaha awm mek an ni.
Young Lai Association New Kakichhuah Branch chuan an khua atangin zinchhuah an khap a, damdawi lam thiam leh an harsatna buaipuitu tur ni lo chu tumah an khuaa lut rih lo turin an ti.