High School Leaving Certificate 2023 exam result tihchhuah taka sawrkar school an tichhe ber chu lungawithlak loh an tih thu AAP Mizoram chuan an sawi.
Aam Aadmi Party Mizoram hruaitute sawi danin, HSLC result chhuakah tunhnai kum 5 chhungin sawrkar school pass percentage a tlahniam char char a, hei bakah hian sawrkar school hi kum 2015-ah 1646 a awm laiin kuminchuan 1577-ah a tlahniam a. Hei hi sawrkar tan a zahthlak ngawih ngawih tih sawiin, “School Education minister hian a tih tur a ti lo hle in kan hria a. Kuminah pawh nikum leh kum hmasa lama sawrkar school-in harsatna an tawhna ngaiah bawk harsatna an tawk leh a ni,” an ti.
Hetianga zirlaite leh zirna in ngaihsak lo tu Education minister hian a hna a vil hnehlo, tia sawiin, a hna a ngaihsak lo a nih chuan a hna atang hian bang ngam se, tih chu an duhdan a nih thu leh a ngaihna hria minister-in he dinhmun hi chelh zawk se an duh tih an sawi. An pawl chuan zirna chu Mizoram hmasawnna atana rahbi pawimawh ber tih an hriat thu sawiin, AAP-in lalna a chang a nih chuan Delhi-a zirna an siamthat anga an siamthat ve tur thu an sawi a ni.
Hetihlai hian AAP Delhi chuan AAP Mizoram State president atan an chairman lailawka awm Andrew Lalremkima an rawn ruat tih AAP Mizoram hruaitute hian an sawi.
HSLC-a sawrkar school result lungawithlak loh – AAP Mizoram
Get real time updates directly on you device, subscribe now.
Prev Post
Next Post