HSSLC-ah zirlai exam zaa 78.04 pass

On May 22, 2024 9 0

Mizoram Board of School Education (MBSE) chuan Thawhlehni khan Higher Secondary School Leaving Certificate (HSSLC) 2024 result a tichhuak a. Zirlai exam 11824 zinga 9227 (78.04%) in an pass a, nikum aiin pass percentage a chhe zawk.
Arts stream-ah top 10 ah mi 15 (4-na 2, 6-na 2, 7-na 2, 9-na 3) an lang a, Linden Lalremtuatpuia s/o C Lalrindika, Oikos Higher Secondary School chu pakhatna a ni. Science stream top 10-ah mi 10 an lang a, Lalramdina Ralte s/o Lalthakima, St. Paul’s Higher Secondary School chu pakhat a ni. Commerce top 10-ah mi 11 (10-na 2) an lang a, David Lalhminghlua s/o Paul Zakhuma, St. Paul’s Higher Secondary School chu pakhat a ni.
Kuminah hian zaa za pass-na school, arts-ah 54, science ah 2, commerce ah 6 an awm a. Zaa za fail-na school arts-ah 2, science ah 2, commerce ah 1 an awm a, candidate pahnih khat chauh awmna vek niin, a tamna berah zirlai 4 an ni.
Compartmental chance nei zirlai 52 an awm a. Exam zingah dan bawhchhiat avanga hnawhchhuah ngai emaw thuneitu sang hnena report ngai emaw an awm lo.
National Education Policy 2020 zulzuiin kumin atang hian zirlai pass zingah subject pakhat (theory paper) ah chauh, tha zawka hmuh inbeisei tan ‘chance’ siamsak an ni a, compartmental exam ti turte tih rualin an exam ve leh thei dawn a ni.
Kum 2023 khan HSSLC exam hi mi 14091-in hmachhawnin 11084 (78.66%) an pass a; kum 2022-ah pass percentage hi zaah 82.07 a ni a, a hniam zawngin a kal a ni.
Arts stream bikah kum 2023 khan mi 10216 zinga 8003 (78.34%) in an pass a, kuminah chuan mi 8467 in exam hmachhawnin 6749 (79.71%) an pass a ni. Arts stram bikah chuan nikum aiin pass percentage a tha zawk.
2023 khan science stream-ah mi 3075 in exam hmachhawnin, chu’ng zinga 2389 (77.69%) in an pass a, kuminah chuan mi 2808 in exam hmachhawnin 2041 (72.69%) in an pass. Pass percentage nikum aiin a tlahniam.
Commerce-ah chuan kum 2023 khan exam hmachhawn zirlai 800 zinga 692 (86.50%) an pass a, kuminah chuan pass percentage nikum aia tlahniamin mi 549 in exam hmachhawnin mi 437 (79.60%) in an pass.