Human trafficking: Hmeichhe naupangin an tuar nasa

Human trafficking: Hmeichhe naupangin an tuar nasa
Mihring hralha sumdawnna (human trafficking) hi sawi a tam a, Asia chhim lam ram atanga mihring hralh thinte hi Europe ram hmun hrang hrangah an man leh fo thin. Heng an mi man zingah hian India rama mite pawh an awm.
An sawi fo angin human trafficking hi naupangin an tuar nasa zual a, naupangah pawh hmeichhiaten an tuar nasa zual.
UN Office on Drugs and Crime (UNODC)-in ram 142 atanga report an dawn an tlangzarh, ‘Global Report on Trafficking in Persons 2018’ atanga a lan dan chuan mipat hmeichhiatna kaihhnawiha hralh hi an tam ber.
Mihring hralh chhawn thin zawng zawnga 30% chu naupang an ni a, heng zingah hian mipa naupang aiin hmeichhe naupang an tam bawk.
Asia chhim leh chhimthlang lam ram atanga hralhte hi Europe chhim leh khawthlang lamah man an ni leh fo thin a. Heng lai hmuna hetiang man chhuah 5% chuang mah hi helai bawr atanga an hralh chhuah leh heng lai mite hi an ni.
Report-ah chuan, “Hralh chhuah mante hi Asian chhim lam ram – Bangladesh, India leh Pakistan atanga an hralhte an ni tlangpui a, Nepal leh Sri Lanka an tel bawk a. Afghanistan lam mi an hralh hi chu Nordic ramah leh Netherlands leh United Kingdom-ah lo man an ni tlangpui,” an ti.
Report atanga a lan dan chuan Asia chhim lam atanga hralh chhuahte hi ram hrang hrang 40 chuangah man an ni a. North America ramte bakah Bangladesh leh India atanga hralh chhuahte hi Asia chhimchhak lama man an awm nual a ni.
Bangladesh, Maldives, Nepal leh Pakistan lam mi an man chhuah 59% zet chu hmeichhia an ni.
UNODC Executive Director Yury Fedotov chuan mihring hralh thinte hi mipat hmeichhiatna lama zawrh an nih bakah hian firfiaka chetna atan an hmang thin bawk niin a sawi a. Indo turin an chher a, a chhertute tho hian mipat hmeichhiatnaa inhrikthlak nan an hmang thin bawk niin a sawi.