Hunpui laia chetsualnaah mi 5 thi

Hunpui laia chetsualnaah mi 5 thi
Krismas leh kumthar vuakveta hmun hrang hranga chetsualnaah mi 5-in nunna an chan a, hliam an awm bawk. A tam ber hi lirtheia chetsualna a ni.
January 3 chawhnu dar 2.15 vel khan Champhai district Melbuk daiah truck leh bike insu in bike khalhtu a thi. Thudawn danin NH No.6 kawngpui, Mekbul dai bawlhhlawh paihna bulah bike leh truck, Melbuk lam mi khalh ve ve chu kawngkawiah an insu a, bike khalhtu Siamthangpuia (44) s/o Zothangliana chu ka chhawn lohin a thi. Champhai Police-in thil awmdan enfiahin thubuai ziahluh a ni.
December 31 tlai dar 5 vel khan Champhai Ruantlang leh Champhai Zotlang inrinaah bike leh scooter an insu a, scooter khalhtu Lalhminghlua (24) s/o Lalmalsawmi, Ruantlang a thi. Thudawn danin Lalhminghlua hi hmeichhe pakhat nen Ruantlang atangin Champhai lam panin scooter-in an tlan a, Zokhawthar atanga Champhai pana tlan haw bike, Michael Vanlalvena (19) Bethel Veng Champhai khalh nen Zotlang leh Ruantlang infinna lai kawngpuiah an insu a, an vai hian hliam tuarin Lalhminghlua hi Med Aim Hospital thlenpui a nih chuan chhan hman a ni tawh lo tih an lo sawi a ni. Midang hliam hi chu nunna atana hlauhawm an awm lo nia sawi a ni. Bike khalhtu leh ami phurh hi hmanraw hmanga enfiahnaah zu an rui tih finfiah a ni tih thu dawn a ni.
December 30 chhun khan Lalduhsangi (25) w/o Lalrintluanga, Chhingchhip chu an khaw daiah thi chhawnga chhar a ni a, lirthei sut/ chil hliam ni ngeia ngaih niin, damdawi in panpui ni mah se, a hliam tuar loin a thi a ni. Thudawn danin Lalduhsangi hi Chhiahtlang khawchhuak an ni a, a nu leh paten kumthar hmang tura an sawm angin an nupa in bike-in kal an tum a, an khua an pelh hnu lawkah an thil phurh an thloh avangin an pa hi zawng turin a let leh a, a ni hian kawngah a lo nghak a ni. Hetihlai hian helaia lirthei tlante chuan kawnga hliam tuara a lo let reng hi hmu in an bawihsawm nghal a, a ti palhtu ni thei awma ngaihte pawh rin hriat theih an nih angin khawtlang hruaitute leh police hrilhhriat an ni a, hnamdang khalh tank lorry pahnih chu hren niin, heta pakhat zawk khalhtu hi pawikhawihtua ngaih a ni a, thubuai siamsak niin boruak duhawm lo thleng theiah Central Jail-ah thawn nghal a ni.
2024 December 24 zan dar 11.00 vel khan Champhai Electric Veng, Tourist Lodge kiang, Vaihmunah bike chesualin a khalhtu CK Laltlansanga (20) s/o Lalthangliana, Bulfekzawl Champhai district, tuna Champhai Kanan Venga khawsa mek chuan hliam na tak a tuar a, Champhaia Med-Aim Hospital panpui a nih laiin a hliam tuar loin a thi. A mi phurhin hliam tenau tuarin a nunna atan hlauhthawn awm a ni lo nia thu dawn a ni.
2024 December 21 chawhma dar 11.20 vel khan Power & Electricity department-a thawk Lalremruata (33), Mamit Hmar Veng chu electric line an endiknaah electric current kalin a man a, a thi. Thudawn danin JE hoin Mamit Hmar Venga 132kV Sub Station bula 11kv line isolator vuahtha in, line hnawk an tifel a, hna an tan hma pawhin line hi midangin an khawih thoa, current a kal hriat a ni lo. Mi pathum thawkin isolator pathum vuah turah isolator pakhat an vuah hnu, pahnihna an vuah mek laiin current kal ta thut hian a man ta a ni. Damdawi in panpui ni mah se, a nunna chan hman a ni ta lo a ni.