Hursualna lama kumtling lo thlalak thehdarhtu mi 5 man

Hursualna lama kum tling lote lanna thehdarh kawnga mawhphurtua puh mi panga chu Mizoram Police-in an man.
Cyber Crime Police Station CID Crime, Saitual Police leh Lunglei Police tangho chuan September 26 khan Child Sexual Abuse Material (CSAM) tia an sawi, kum tling lote bawlhhlawh taka mipat hmeichhiatna kaihhnawiha chhawr leh tih khaw loh na lam thlalak emaw video vawnthat leh social media-a thehdarh chungchangah Mizoram hmun hrang hrang atangin inhnamhnawih, Cyber Crime PS hmalakna in Aizawl atangin mi pathum, Saitual PS leh Lunglei PS hmalakna in mi pakhat ve ve, an vaiin mi 5 chhuichhuah niin, an mobile phone pawh hnuchhui zelna atan hrensak an ni. Criminal case siamsak niin, uluk taka chhuizui an ni.
Cyber Crime Police hotute sawi danin, CSAM hi kum tlinglote bawlhhlawh taka mipat hmeichhiatna kaihhnawiha chhawr leh tih khaw loh chungchang thlalak emaw video emaw sawina a ni a. Hei hi thil bawlhhlawh leh tenawm tak, a tuartute tana thil pawi liantham tak thlen theitu a ni. Naupang kum tling lote mipat hmeichhiatna kaihhnawiha an thlalak leh video en thin emaw social media-a post, download, thehdarh, kawlthat emaw, chutiang thlalak leh video siam emaw chu IT Act 2000 hnuaiah dan bawhchhiatna lian niin, kum 5 thleng lung in tang tura hrem theih an ni a; hrem nawnte chu kum 7 thleng tang tura hrem theih an ni.