I best friend zunah i uai em ni?

|hian anga i lo kawmngeih em em tawh, i thian tha ber ang hiala i lo neih tawh hnena i hmangaihthu hrilh chu thil harsa leh buaithlak ve tak a ni thei a ni.
I thiantha ber ni a i ngaih zunah i uai a, hrilh dan tur i hre si lo. I dinhmun kha a khirhve riau a ni. A bik takin in inthianthatnain a tuar i hlau bawk si. I rilru ang a lo pu ve lo ang a, inhmuhthiam lohna a thlen phah zawk hial te i hlau a. Chuvangin a laka i rilru puthmang chu sawichhuah i hreh a, mahse, thian anga inkawm erawh harsa i ti tawh bawk si- i hmangaih tawh miau si a! Chutiang hunah chuan uluk taka inngaihtuah a tul a- engtin nge a rilru tina si lova i rilru puthmang chu i hrilh tak ang?
A hmasa berah chuan i hmangaih tak zet em tih inhriatchian tum ang che. Hmangaihna pawh ni chuang lovin inpahniha hun inlo hman dun tam tawh vanga in ngainatna leh induhna hi lo piang ve thei a ni. A laka i rilru puthmang chu hmangaihna a ni tih i chian chuan i hriat tir dan tur uluk taka i ngaihtuah a tul ta a ni.
A hun leh a hmun thlan thiam hle a ngai. Thawklehkhata inpuan thut chi a ni lo, chuti lo chu a ngaih a tha dawn lo a nia. Midang awm lohna hmunah, thlamuang taka inawm theihna hmun thlang thiam ang che. I rilru puthmang chu chiang leh fiah takin hrilh tur a ni. Chutiang i hriattir hnuah i thian chuan inngaihtuahna hun a mamawh tih hria la, i bula awm tam loh a duh rih pawh a ni thei, chuvangin nangmah zawk inthiarfihlim thiam ang che. I thian chu thutlukna siam turin hun pe la, a thutlukna chu engpawh nise zah sak ang che.
Hetianga i rilru puthmang dik tak i hriattir hma hian chetziain, a hriat thiam theih tura lan tir deuh fo tum rawh, chu chuan a pui ngei ang che. Entir nan, romantic deuh film te enpui la, zanriah te ei chhuah pui la, thilpek te lei sak la, inmangtha dan romantic deuh hlek te ngaihtuah rawh. Mahse, i hriat reng tur chu, heng zawng zawng hi muang changa chet lakna chi a ni a, tih phut phut tur a ni lo.