I kawppui kha lerh nge lerh lo i hre duh em?

I kawppui kha lerh nge lerh lo i hre duh em?
Hei le, hmeichhe tana thil tha deuh mai kan rawn tarlang dawn e. I bialpa/kawppui kha a lerh nge lerh lo tih i hre duh em? Chutiang hriat theih dan chu a awm niin relationship lama mithiam ten an sawi tlat mai.
I hmuh loh lai emaw i hriat laia midang han chhaih deuh har har te kha a lo ching ru viau em tih i hriat duh chuan heng zawhna te hi chhang la, a tawpah eng dinhmunah nge i awm tih i inhriat theihna kan rawn dah nghal e.
1. I kawppui chuan i hmeichhe thiante chanchin sawichhuah a ching em? Entir nan, in pahniha eng emaw insawi dun changin i thian tu emaw (hmeichhia) chungchang han rawlh ve deuh sek a ching em?
a. A ching deuh tlatin ka hria, ka thiannu chanchin te pawh kan sawi dun fo mai.
b. Chutiang engmah a sawi ngai lo.
2. Party-naah emaw, eng emaw tihpui nikhuaah emaw, i kawppui chuan a thian ni a a sawi hmeichhia te bulah nangma tawka awm turin kalsan che a ching em?
a. Tehreng mai, chutiang chuan a tiziah alawm.
b. Party-naah chuan midang te pawh kan kawm ve thin tho nain, kan pahnihin kan inthlahfal ngai meuh lo.
3. Room khata inawm dun laiin hmeichhe dang a bia a. Engtin nge a awm?
a. Ka awm ve lo ang maiin a che vel a, a ‘flirt’ a ni deuh ber, a ti ti tui thei suam suam khawp mai.
b. A hmeichhe biak lai chu be tui viau mah se ka awm ve tih hrerengin, min rawn melh deuh zauh zauh thin.
4. A hmeichhe thiante a ko duat ngai em?
a. Tehreng mai, ‘Mâte’ a tih loh leh ‘Bawihi’ a ti nêm duai zel.
b. Chutiang a tih ngai awm ka hre lo.
5. Hmeichhe dang nena an chanchin mi sawi thawi deuh tal i hre tawh em?
a. Hre fo e, amah hi miin an hre lar a niang. Chu chu a pawi em ni?
b. Chutiang an sawi awm pawh ka hre ngai lo.
I chhanna te chu:
‘a’ a tam zawk a nih chuan- vanduaithlak takin i bialpa/kawppui chu a lerh tlat mai. Hmeichhe dang han melh kual vel a hreh lo tlat. I fimkhur viau a ngai a, i check deuh zeuh zeuh a tha ang, chuti lo chu midang han chet ‘meh’ pui zauh kha a hreh dawn tlat lo.
‘b’ a nih deuh vek chuan- i vannei e, bialpa/kawppui lerh lo tak, midang chhai san mai mai lo tur che i nei tihna a ni. Chutiang a nih loh vek chuan a inthup thiam hle tihna a ni ang. Mahse, eng emaw rinhleh tur i hmu te a nih loh chuan a inthup a nih ring ngawt suh.