IAF tana ram lei sawrkarin a hriatpui loa sawi hi dawt – Lalnunmawia Chuaungo

IAF tana ram lei sawrkarin
a hriatpui loa sawi hi dawt
– Lalnunmawia Chuaungo
Indian Airforce tana ram lei an hriatpui lo ni awma adviser to chief minister-in a sawi chu dawt a ni a, dan bawhchhiatna tam a awm tih Congress hruaitu Lalnunmawia Chuaungo chuan a sawi.
Zirtawpnia Congress Bhavan-a inkhawmah MPCC senior vice president Lalnunmawia Chuaungo chuan, tunhnaiah Lengpui Airport hrula ram inlei chungchanga thil diklo miuiin an vei chu a lawmawm tih sawiin, hetiang thil diklo tak hi kan enliam mai tur a ni loa, a titute hrem loha an chhuah lohnan mipuiin tan kan lak a ngai tih a sawi a ni.
Lengpui Airport bula ram lei chungchangah MNF-in cheng vaibelchhe tam tak ei tumin thil an kalpui a, nimahse, official-a an kalpui thui hma in an sawrkar a tlak tak avangin an tifel hman ta loa, 2025 February 21 khan chief minister Pu Lalduhoma’n compensation tam uchuak tak pek tumna a awm avangin ram inleina hi an titawp rih a, ‘abeyance’ ah an dah tak tak lo nge, 2025 May 25 khan ram inleina tur notification an tichhuak leh si tih a sawi a ni.
“He ram inleinaah hian land aquisition process mumal taka kalpui a ni loa, mipui a nghawng dan tur, social impact pawh zirchian a ni loa, hmanhmawh taka kalpui a ni. July 24 khan ram inleina an tifel vek hman a, ram lak dan tur kalhmang anga kalpui a ni loa, dan pawh an bawhchhe vek,” a ti.
Adviser to chief minister-in MNF sawrkar laia tih fel vek a ni tawh a, DC level-ah tih fel a ni a, an hriatpui lo, tia a sawi chu, CM leh sawrkar hotu lawktem an hriatpui tih Mizoram chief secretary hlui Lalnunmawia Chuaungo hian a sawi a. Dan bawhchhiat leh palzutna a awm tih a sawi a ni.