IASE zirlai tithate chawimawi

Institute of Advanced Studies in Education (IASE) Republic Veng chuan master of education (M.Ed) leh bachelor of education (B.Ed) zir chhuak zirlai tithate chu Thawhlehni khan an chawimawi.
Tun dinhmunah IASE-ah hian B.Ed zirlai 300, M.Ed zirlai 60 leh Ph.D ti lai 36 an awm a. Kumtinin mi 150 velin B.Ed hi an pass chhuak thin a, M.Ed pass chhuak 40 vel an awm ziah bawk. Kumin university exam result chhuakah khan IASE-a zirlaite hian result tha tak neiin, M.Ed-ah 100% pass-in B.Ed-ah 99.2% an pass a, pass chhuakte zingah university top 10, rank holder engemawzat awmin, M.Ed leh B.Ed topper-te hi IASE zirlaite an ni.
Chawimawina hmanpuitu minister C Lalsawivunga chuan zirna chu ram leh hnam hmasawnna bul a ni a, a phena thiamna tak tak neih a pawimawh tih a sawi. Zirlaite chu chhawr tlak thiamna zirchhuak ngei turin a chah a. Tunlai khawvelah zir chhuah satliah mai a tawk tawh loa, chumi atan chuan inchher hriam zel turin a chah a ni.