ICDS project chhawrtu nuai chuang

Women & Child Development department hnuaia Integrated Child Development Services (ICDS) chu Mizoramah chhawrtu mi 1,17,782 an awm.
Hemi kaihhnawihah hian Population Council Consutling New Delhi chuan Mamit district a zirchianna chu lehkhabu ah siamin, he lehkhabu ‘Diet Diversity and Nutritional Outcomes Among Children and Women: A Study of Mamit District’ chu Nilaini khan Women & Child Development minister Lalrinpuii’n a tlangzarh.
W&CD director Zoramthangi Chhangte sawi danin, ICDS hi India ram pumah anganwadi nuai 14 a huam a; khawvelah hmeichhia leh naupangte hmathatna tur programme lian ber a ni.
Tunah hian Mizoramah pawh ICDS project 27 kalpui mek a ni a, heng hnuaiah hian anganwadi 2244 enkawl a ni. Poshan Tracker-a a lan danin, Mizorama ICDS project kalpui hnuaiah beneficiary 117782 an awm a; chu’ng zingah chuan naupang kum 6 hnuailam 108255, nu naupai 5912, nu nau hnute pe lai 3610 leh hmeichhe tleirawl (kum 14-18 inkar) 19240 an awm a ni. ICDS hi Mizoramah kum 1978 atanga kalpui niin, kum 46 kalpui tawh a. Poshan Abhiyan pawh kum 5 chhung kalpui tawh mah se, National Family Health Survey 5-in a tarlan danin, naupang kum 5 hnuailam zaa 26 chu thanthu (stunted) an ni a, zaa 14 chu rihna hniam (underweight) leh hmeichhia kum 15-49 zingah zaa 4 chu rihna hniam (underweight), zaa 45 chu thisen tlachham (anemic) an ni.
Mamit district chu ‘Aspirational District’ a nih vang leh Mizo, Bru leh Chakma hnam an awm vangin Diet Diversity and Nutritional Outcomes Among Children and Women zirchhianna beihpui thlak a ni.