ICE agent-in mi a kah hlum vangin Minneapolis boruak tang

ICE agent-in mi a kah hlum
vangin Minneapolis boruak tang
Minneapolis, Minnesotta-ah US-a pem buaipuitu zinga mi, immigration agent-in hmeichhia kum 37 mi, fa pathum nei a kah hlum avangin khawpui leh state sorkar, President Donald Trump-a sorkarin an rama pemte a tih dan duh lotute an tawng chhuak na hle a, kawtthlerah inthahna thleng duh lohna lian tak lantir a ni bawk.
Ningania Minneapolis-a thihna a thlen hnuah hian immigration court awmna sorkar laipui building tualah mi 1,000 vel lungawi lovin an pungkhawm a, ‘zahthlak’ tih leh ‘tualthahna’ tiin an au va. Sorkar laipui officer-ten an dang a, thenkhat chuan tear gas leh hmarcha dip hmangin an phuh bawk.
Inthahna thlen dan hi Minnesota leh Trump-a sorkar sawi dan a inang chiah lo va. Immigration & Customs Enforcement (ICE) agent pakhat, tu nge a nih hriat lovin US khua leh tui, Renee Nicole Good-i chu an chenna bulah a kap hlum a ni.
Minnesota Bureau of Criminal Apprehension (BCA) chuan FBI nen a huhova chhui turin an inrem tawh tih an sawi a; mahse, sorkar laipui hnuaia thil chhuitu pawl hian anmahni puala chhui an tum tih an sawi leh a. A hnuah BCA Superintendent Drew Evans-a chuan state sorkar atanga chhui ve turte hian thil thlenna hmun, finfiahna leh mi kawm pawh an ti zui thei tawh lo niin a sawi.
FBI leh US Attorney Daniel Rosen-a pisa chuan BCA thuchhuah siamah hian engmah an la sawi lo.
Mi kap hlumtu hi Minneapolis-a duty-a awm tura tih ICE agent 2,000 zinga mi a ni a, Department of Homeland Security chuan ‘DHS-in beihpui an thlakna lian ber’ tiin an chet chhuahna chu a sawi.
Homeland Secretary Kristi Noem telin DHS thuneitute chuan inkahna chu mahni invenna niin an sawi a, hmeichhia hian agent-te hi a lirtheia chil a tum niin an sawi a. Minneapolis Mayor Jacob Frey-a erawh chuan a bula dingten video an lo lak atangin chutiang a ni lo tih a sawi a, phatna chu ‘thil tenawm tak’ niin a sawi ve thung.
Video darhah chuan hmai tuam officer pahnihin Good-i car an pan a, pakhatin chhuak tura tiin a car hawnna a vuan a, car hi a hnung zawnga tlanin hma zawngin a tlan leh a, ding lamah, tlanchiat tum ni awm takin a lang a ni.
Officer dang, car hmaa vei lama mi chuan a silai vawi thum hmet puakin hnung lamah a zuang zui a, a silai hmet puah hnuhnung ber hian a khalhtu tukverh a fuh a, bumper-in a kaptu taksa hi a hnawl zui bawk.
Minnesota danah officer-in hnialtu a tawng a nih chuan chhan tha taka avang leh mi dang thihna leh natna thleng thei a awmin tharum a hmang thei a, hei hi sorkar laipui dan pawh a ni bawk.
Good-i thihna thleng avang hian Minneapolis khawpuiah chuan mipui thin a rim hle a, venthawn thilah Ningani leh Zirtawpni chu zirna in khar a ni dawn a. Venhim hna thawktute pawh an inring hle bawk.
Thi hi Good-i a ni tih puangtu, Minneapolis City Council chuan a thih tuk hian ‘an thenawmte a tlawh kual chu sorkar laipui mite kutah a thi ta a ni’ tiin an sawi.
Washington Post chanchinbu chuan Good-i hian fanu kum 15 mi leh fapa pahnih, kum 12 leh kum ruk mi a nei niin an tar lang.
Trump-a sorkar hian an rama pem lutte um chhuah beihpui thlakin dan lova an rama khawsate dap chhuak tur hian ICE officer-te an hmanhlel hle a. A hmalakna hian state leh khawpui hrang hrangah dodal a tawk nasa hle a ni.