IDY-ah yoga record an siam

Diamond City an tih mai Surat-ah chuan International Day of Yoga (IDY)-ah mi 1,53,000-in a huhoin hmun khatah yoga an ti a, Guinness World Record an siam a, record certificate pawh state chief minister Bhupendra Patel hnenah an hlan nghal a ni.
Surat mipuite chu zing dar 4 atangin an pungkhawm tan tawh a, an khawpuia Y junction-ah chuan mipui an zi huai huai tawh. He kawng pahnih hi km 4 ve ve a thui niin, meter 300 a zai a ni a, he Y junction pawh tak hian record siamna tel tum te hman turin carpet an phah chhuak vek a ni. Participant te hi group 1,000 te tein then an ni a, tichuan group 140 ah an insiam ta a ni.
Team zawng zawng tan LED screen leh speaker leh yoga instructor leh volunteer an awm vek a, volunteer-te hi a hma niin mi engzat nge tel tih chhiar turin a tihdan tur lo zirtir lawk vek an ni. Record siamna hmuna kal zawng zawng chu an thlen veleh ban bun (wristband) barcode awm an lo pe vek a, barcode hi scan-in an kal ngei tih finfiah nan hman nghal a ni.
A hmaa hetiang record chu Kota, Rajasthan a siam niin, hmun khatah mi 1,00,984-in yoga an ti a, he record hi Surat hian a rawn khum chiang hle a ni.
IDY-ah hian Prime Minister Narendra Modi hoin New York-ah pawh record an siam a, yoga session-a ram hrang hrang mi tel hnem ber record a ni ve thung. Record hi UN Headquarter tualah neih a ni a, UN General Assembly president Casba Korosi leh Permanent Representative of India to the UN Ruchira Kamboj te pawh a tel.
Guinness World Record aiawha endiktu Michael Empric chuan, “Vawiin hian yoga session-a ram hrang hrang mi tel tam ber record siam tum a ni a, ram hrang hrang 140 atanga tel tur an inbeisei aliin, vawiin hian New York-a UN hmunah hian ram hrang hrang 135 atangin an tel a, Guinness World Record thar a ni,” a ti.
Ram hrang hrang 100 atanga UN palaite an tel a, US-a mi chi hrang hrang, New Yorker, Hollywood milar leh India mi leh sa te pawh an tel a, record siamna yoga session him PM Modi-a’n a kaihruai a ni.