Ni khat chhung Aizawl khawpui kawn thenkhat an dapnaah mi 30 chuang inner line permit neiloa dan loa khawsa an hmuchhuak hman tih Mizo Zirlai Pawl chuan sawiin, permit pek leh a enzui kawngah thuneitute fimkhur tur leh khauh lehzual turin an ngen tih an sawi.
-- Advertisement --
MZP Gen. Hqrs. chuan Inrinni khan Aizawl khawpui kawn hrang hrangah hnamdang dan loa khawsa dapin hnatlang a ko a, inner line permit (ILP) neilo mi 37 vel bakah kumtlinglo hnathawka chhawr thahnem tak hmuhchhuakin thuneitute kutah hlan nghal an ni.
Nikhat hnatlannaa hnamdang permit nei loa khawsa leh dan loa sumdawng thahnem tak manchhuah tur an awm chu pawi an tih thu leh, heng hnamdang dan loa khawsate hi permit neilo bakah permit dam hun chhung zo tawh te an nih thu MZP hian sawiin, ‘India danpuiin a bik taka min humhalhna, ILP hi a nihna ang taka hmang tur leh a pekchhuah danah pawh fimkhur lehzuala kalpui turin thuneitute kan ngen nawn a. Mizorama veng/khua local council/ village council thuneitute, hnamdang ILP pekchhuah chungchangah document felfai lo chu hriatpuina lehkha pe tawh lo turin kan ngen a ni,’ a ti.
Dan loa hnamdang khawsate dapchhuah hnatlangah hian MZP hruaitute bakah college hrang hrang Students’ Union (SU) hruaitute leh hnampual zirlai pawl hruaitute an thawkchhuak a. MZP chuan hnamdang dan loa khawsa a hmuhchhuahte chinchang leh thawnkir an nih dan chu ngun taka a enzui tur thu a sawi a ni.