Govt. Hrangbana College Students’ Union chuan sawrkarin an mamawh ang zirtirtu a pek belh loh chuan lungawilohna lantir an tum tih an sawi.
-- Advertisement --
Govt. Hrangbana College SU thuchhuak chuan, college faculty regularization chungchangah vawi engemawzat sawrkar thuneitute an hmu tawh hnu ah pawh tun thlengin an mamawh chhanna leh inbiakna hlawhtling an hmu lo tih a sawi a. Zirlai 2234 awmah zirtirtu 68 an awm mek laiin, asst. professor (contract) regularization avangin zirtirtu 6 sawnchhuah tura tih an ni a, post ruak hnawhkhat turin zirtirtu 3 dah tura tih a ni thung tih a sawi.
‘Subject thenkhatah February thlaa professor superannuation pension tur pahnih an awm a, kuminah hian professor pension tur engemawzat an awm bawk. Mizoram sawrkar hnuaia college zirlai tam berah hian class lak hleihtheih loh khawpin professor kan indaih lo hle lai a, ngaihsak kan hlawh lo hi a pawi kan ti takzet a ni,’ a ti.
2023 February 2-a Higher & Technical Education-in college hrang hrangte dilna chungchanga thuchhuah a siam chu thutlingah an ngai lo tih Govt. HBS SU hian sawiin, ‘Sawn an nih hmaa sawrkarin college tinte mamawh mumal taka enfiah (inspection) a neilo hi a pawi a. Kan college-in hnathawktu a mamawh dan zirchiang hmasa lo leh posting tharte hmunruak awh tur hi a ranglama min pe turin sawrkar kan phut a ni,’ a ti.
An thil phut hi 2023 February 6 ralhmaa chhanna an hmu lo a nih chuan tiamchin awm loa lungawilohna lantir an tum tih an sawi a ni.