IMD Centre din turin MoU ziak

IMD Centre din turin MoU ziak
Sawrkar laipui Ministry of Earth Science-a India Meteorological Department leh Mizoram sawrkar Directorate of Science & Technology chuan Directorate of Science & Technology hmunhmaa IMD Centre din turin Thawhtanni khan chief minister Lalduhoma hmaah inremna thuthlung (MoU) an ziak.
Chief minister chuan, tunhma chuan sik leh sa a dik a, kan pi leh puten ruah sur hun, thli tleh hun an nei thliah thliah a, an hmingte an phuah a, an beisei hunah tak a lo thleng zel thin a. Tunah erawh chu’ng kan pi leh pute lo sawilawk theih sik leh sa hunbi chu an mumal hleithei tawh loa, science thiamna hmanga kan lo inbuatsaih loh chuan kan thil hriat a dik hleithei tawh lo, tiin, MoU ziah chuan chumi kawngah chuan nasa takin min pui dawn tih a sawi a ni.
MoU ang chuan, Beraw Tlanga Science & Technology Centre-ah IMD Centre din a ni anga, IMD hian Mizoram sawrkar hnenah meteorological data a pe thin ang. Weather forecast leh report dik leh rintlak zawk neihnan hman a ni dawn a ni.
MoU ziah lai hi director general of Meteorology (IMD) Dr Mrutyunjaya Mohapatra pawhin inbiak hmuh theihna hmangin a lo chhim a. Mizoram sawrkar chungah lawmthu a rawn sawi a ni.