Immunity tichak nana juice tha te

Immunity tichak nana juice tha te
Kan taksaah hian natna lo lut tur lo dan tum tang tangtu an awm a, ama tawka do hneh loh te a nei ve thin. Tun tumah hian hetianga kan taksain natna a do theihna tihchak nana juice in tur tha ni a Times of India health section-in a tarlan te kan rawn chhuah chhawng e.
1. Hangover tan dawnfawh, sawhthing leh grapefruit juice: Zu hian taksa a tuiril awm te a tikam duak duak a, mi a ti-dehydrate thei. Dawnfawh hian tui a pai hnem hle a, 92% chu tui a ni a, taksa vawng hnawng theitu tha tak a ni. L-citrulline leh amino acid a pai hnem a, chu chuan thisen luang a tichak a, taksa peng repair nan a tangkai hle. Sawhthing hi pum nuam lo leh luak chhuak tideuh nghulh tan a tha a, grapefruit hian natural sugar reserve a siam a, taksa chakna siamtu tha tak a ni.
2. Lu-na tan spinach leh sawhthing juice: Spinach-ah hian nutrient a tam a, magnesium, potassium leh calcium a pai hnem bawk a, nerve leh tihrawl tihhahdam theihna a nei a, chu chuan inflammation leh luna te a tiziaawm thei. Inflammation awm tir theitu compound chi hnih prostaglandin leh histamine tihniam thei sawhthingah hian a awm bawk.
3. Arngeng tan neem, ser, fanghma leh pear juice: Neem hian antibacterial properties a nei a, fanghma-in vitamin B6, C, K, iron, calcium leh phosphorus a pai hnem a, heng zawng zawng hi vun tana chaw tha vek an ni. Arngeng tan damdawi a ni a, dark circle a tireh thei a, vun a tiêng thei bawk. Pear hian vitamin leh mineral leh antioxidant a pai hnem a, vuna infection awm tur vengtu tha tak a ni.
4. Hritlang tan sawhthing, celery leh green apple juice: Sawhthing hi hritlang tan damdawi tha tak a ni a chhan chu rhivovirus a tihlum thei a, rhinovirus chu hritlang thlentu a ni. Celery-ah hian sodium a tam a, chu chu natural electrolyte niin, taksa vawng hnawngtu tha tak a ni a, apple pawh hian antioxidant a pai hnem a, chu chu immune system tichaktu a ni.
5. Mit tan carrot leh apricot juice: Thei leh thlai serthlum rawng hoah hian beta-carotene a tam a, chu chu mit tana chaw tha a ni a, infection lakah mit a ven theih bakah mit khawhmuh a tifiah thei a, zan lama thil hmuh a tifiah thei bawk.
6. Ek khal tan apple, balhla leh serthlum juice: Ekkhal hi digestive system lam fel loh vang a ni thin a, hetiang damdawi atan hian fiber a tha hle. Apple leh balhla te hi dietary fiber pai tam an ni a, pum lam chiang lo tan a tha a, a bikin inthiar lama harsatna nei tan a tha lehzual. Ser-ah hian vitamin C a tam a, chu chu puma tui hnuk lut tam tu a ni a, ek tinem theitu a ni bawk.