Zhang Yuxuan-a’n four-finger pushup paha kut ben record a siam

Zhang Yuxuan-a’n four-finger pushup paha kut ben record a siam
Four-finger pushup chu kut zungtang pali chauh hmanga pushup tihna a ni a. Chinese pa fit Zhang YuXuan hian a kut ding leh vei lam zungtang pahnih ve ve chauh hmangin pushup a ti a, a innem kang chiah chu a kut a beng nghal ziah bawk a, hetiang hian minute khat chhungin pushup vawi 22 a tihman a, Guinness World Record a siam.
Zhang Yuxuan hi Shaanxi Aviation Vocational and Technical College-a zirlai a ni a, kum 13 mi a nih lai atangin weights leh pushup training hi a nei tan tawh niin a sawi a, junior high school a kal laia kung fu film a en atangin finger pushup hi a titan niin a sawi.
Zhang chuan, “Video en leh online-a hmanrua ka hmuh theih ang ang te hmangin ka inzir thin. Tichuan, finger pushup tichunga kut beng pah bawka record siam an la awm lo niin ka hria a, ka phur zawng tak a ni ta a ni,” a ti a, “Chutih lai hian high school ka la kal a. Miin an duhthusam te an sawi thin a, kei chuan Guinness World Record siam ka chak thu ka sawi ve thin a, ka classmate-te chuan min nuih zat thin,” a ti bawk.
Zhang Yuxuan chuan 2022 khan handstand skips a zawna ti hnem thei ber record siamtu Zhang Shuang a tawng a, Shuang hian Guinness World Record siam tura thil tul leh buaipui ngaite a ngaihtuahpui ta a ni.
Zhang Yuxuan chuan a record siam hi a duhtawk mai dawn lo a, record dang pawh siam leh ngei a tum a, “Darkar khata puhsup tihnem thei record te pawh siam kan la tum ang chu, planking record leh rit phur chunga fingertip pushup bakah handstand walking leh sit up record te pawh siam kan la tum ang chu,” a ti.