Kum 2024 Lok Sabha inthlan awm tura BJP te paihthla tura Opposition tangrualte chuan hmalakna bul tanin Bihar Chief Minister Nitish Kumar-a deputy RJD leader Tejashwi Yadav te chuan Congress president Mallikarjun Kharge leh Congress chief hlui Rahul Gandhi te chu an hmu,
Rahul Gandhi chuan inhmuhkhawmna an neih chu ‘an tana thawkhova beiho tura’ hmalakna hmasa’ tiin a sawi a.
Kumar leh Kharge te hian Kharge chenna inah Rahul Gandi pawh telin darkar khat chuang hun hmangin common political programme siam a nih theih nan thawhzui zel an tum tia sawi a ni.
Congress leader te an hmuh hnu hian Kumar leh Yadav te hian AAP convener leh Delhi Chief Minister Arvind Kejriwal chu hmu zuiin Kejriwal chuan ‘Nitish Kumar-an Centre a sorkar thlak a duhna’ chu lawmawm a tih thu a sawi zui bawk.
Sawi danah chuan Nitish Kumar chu United Progressive Alliance convener a ni dawn a, party dang dangte pawh sawm zuiin Lok Sabha poll-ah BJP te chu paihthlak an tum dawn tia sawi a ni.
“Nitish Kumar chu 2024 Lok Sabha inthlana Opposition unity awm nana architect a ni ang,” tiin JD(U) official tweet chuan a tarlang.
Congress leader te thung chuan, “Meeting kan neihnaah common Lok Sabha seat emaw Nitish Kumar hmalakna tur sawihona kan nei lo. Kan thlurbing chu party tam zawk sawm luh leh common programme siam niin Lok Sabha atanga Rahul Gandhi ban a nihna chuan chu chu a pawimawhna an hmuhfiah phah a ni,” an ti ve thung.
Meeting neih zawha Kharge an press conference a neihnaah pawh Opposition te chuan tangrualin Constitution leh democracy humhimin ram chu tha zawkin an kalpui thei dawn a ni, a ti bawk.
-- Advertisement --
‘Ideology inbeihna’
“Vawiinah, sawihona tawp neiin chumi behchhan chuan hma lam panin kan kal zel tawh ang a. Inhmuhkhawmna kan nei leh ang” tiin Bihar Chief Minister chuan sawiin, “Kan inhmuhkhawm lehah chuan mi tam tak in hmu tawh ang” tiin a sawi bawk.
Opposition party engzah nge tel ang tia zawhna chhangin Rahul Gandhi chuan, “Kan kalpui mek a ni a, Opposition vision te thlifimin party dang dang ten min zawm ang a, ideology a inbeihna hi tangrualin kan bei tlang ang. Insitution beihna leh kan ram beihna lakah hian kan tangrual dawn a ni,” tiin a sawi bawk.
JD-U president Lalan Singh, Bihar Congress chief Akhilesh Prasad Singh, Rashtriya Janata Dal Rajya Sabha MP Manoj Jha leh Congress leader Salman Khurshid te pawh meeting neihnaah hian an tel bawk.
A hma niin Congress chief Mallikarjun Kharge chuan Tamil Nadu Chief Minister M.K. Stalin leh Maharashtra Chief Minister hlui Uddhav Thackeray te nen pawh phone hmanga inbiakna an nei tawh bawk a.
Bihar CM hian hruaitu dang dang Trinamool chief Mamata Banerjee, BRS chief K. Chandrashekar Rao leh SP chief Akhilesh Yadav te Congress laka inlahrangte pawh a hmu zui dawn nia sawi a ni bawk.
BJP ten bei zui nghal
Information and Broadcasting Minister Anurag Thakur chuan Opposition tanrual tuma hmalak mekna chu bei nghalin ‘tangrual pawh an ni lo, corrupt parties inzawmkhawm an ni zawk’ tiin a sawi.
“Party hrang hrang eiruknaa inchiahpiah nuai intelkhawmna awm chuan ‘thugbandhan’ din a ni thin. Mipui ten policy an nei lo va, tum bik an nei lo va, leader an nei lo tih an hria. Hetianga hmalakna hian an eirukna a thup dawn chuang lo,” tiin Thakur chuan a sawi a.
‘Thugbandhan’
“A nihna takah chuan alliance pawh an ni lo va, corrupt parties intelkhawm an ni a. An tum a fel lo nghal a, mipui ten hetiang mite an vote ngai lo va, mipui ten an ngaina lo va, an hnawl char char zawk a ni. Kum 2014 leh 2019 khan ‘thugbandhan’ an din tawh a, mahse, a result chu a ngai reng. Mipui ten corrupt party te hi an hnawl a, tum hnih lai Modi kaihhruaina hnuaiah sorkar absolute majority nei tum hnih an siam tawh. Alliance engzah pawh din ni mah se, mipui ten an ngaihdan an siam fel tawh a, inthlan lo awm turah pawh lotus a vul, a vul zel ang,” tiin a sawi bawk.
“He alliance siamin a tum leh el ber chu Prime Minster Narendra Modi, CM-a kum 22 ni tawh leh tunah PM nia rinawm leh thianghlim taka chawlh pawh la ngai lova thawk mek hi a ni. Kum 2014-a India economy derthawng tak kha tunah chuan top 5-ah a lang tawh” tiin Thakur chuan a sawi bawk a.
“Vawiinah hian steel leh milk production-ah pakhatna kan ni a, mobile production-ah pahnihna kan ni bawk a. India hi khawvela economy lian zinga thang chak ber a ni a, startup ecosystem-ah pathumna kan ni bawk a. Khawiahmah compeititon a awm lo. Mipui ten Modi Prime Minster ah an dah vangin kan lawm a, tichuan Covid management hna a thawh theih a, hna tha a thawh theih bawk a ni,” tiin a sawi bawk a.
“Khawvel huapin Modi policy avangin India chu a sang zual zel a ni,” tia sawi bawkin, opposition te chuan ‘politics thila an ral loh nan platform khata insiam an tum mai a ni’ tiin Minister chuan a sawi bawk.