Imphal-ah Zofate engemaw zat la tang

Imphal-ah Zofate engemaw zat la tang
Imphal leh Manipur hmun dang atangin Zofate hruai chhuah an ni mek a, chutih laiin Imphal-ah hian Zofa engemaw zat an la tang. Sing an tling mai thei tih thu dawn a ni.
Imphal-a la tangkhang mekte hi Manipur state mi, Zo hnahthlak an ni tlangpui a, tuna Mizorama hruai chhuahte hi chu Mizoram mi an ni hlawm.
Imphal-ah hian Imphal leh a chhehvela cheng, ram neia awm Zo hnahthlak engemaw zat an tang a, sipai leh force hmunah an awm mek tih thu dawn a ni.
Thu dawn anni hi chuan hmun dang han pan pawh an rilruk hran lo a, chhuahna tur pawh an nei rih lo. Mahni in leh lova him lo an ni a, an in leh lo chu buaina chhuahna Manipur state chhung a ni.
Imphal atanga thu dawn danin, Leimakhong-a Assam Rifles camp-ah Zo hnahthlak mi 5000 chuang an awm a, hei hi Imphal-a an tam berna a ni.
Anni hi an hrehawm lo a, ei leh in an pek that bakah tui tam lai a ni lo chungin tui pawh an harsa lem lo a, inbual leh insil pawh an ti thei tih thu dawn a ni. Assam Rifles-ah hian Zo hnahthlak an awm a, anni hian an ngaihven hle tih thu dawn a ni bawk.
Hriat theih chinah Lamphel-a CRPF hmunah Zo hnahthlak 2000 vel an awm bawk a, anni pawh hian harsatna an tawk lem lo tih thu dawn a ni.
Sipai leh force-ho awmna hmun dangah pawh Zo hnahthlak tlan lut, awm mek an awm nual a, thlawhna ticket nei chu sipaiin airport-ah an hruai thei nia sawi a ni.
Imphal-ah hian Zo hnahthlak hi an awm nual a, Duhlian tawng hmang hi 500 vel niin, a tam ber chu zirlai leh hnathawka awm an ni. Chhungkuaa awm hi 50-70 vel an ni a, anni pawh hi hna vanga awm an ni ber.
Duhlian tawng hmang lo Zo hnahthlak hi sing chuang an awm nia hriat a ni a, anni hi sipai leh force-ho awmnaah an awm tlangpui nia hriat a ni.