Mizorama awm Meitei-te him

Mizorama awm Meitei-te him
Meitei-te’n Mizote chungah lawmthu sawi
Manipur-ah chi leh chi inkarah buaina a chhuak a, Zofate’n an tuar mek. Hei hian Mizoram a nghawng mek a, mahse Mizorama Meitei-te an him.
“Kan him a, nakin zel chu kan hre lo a, tunah chuan kan him a, kan lawm khawp mai,” All Mizoram Manipuri Association vice president Ranbir Singh chuan a ti a, “Mizoram chungah hian kan lawm a, Mizote chungah kan lawm tak zet a ni. Mizoram sorkar, NGO leh mipui chungah kan lawm tak zet a ni,”
Mizorama an member te’n kut an tuar lo a, an chungah thil tha lo a thleng lo tih a sawi a, an him zel pawh an beisei thu a sawi. “Thil kal zel dan tur chu kan hre lo a, nakinah kan him lo ang tih chu kan hlau a, mahse kan him zel kan beisei,” a ti.
Mizoram atanga haw ta Meitei-te pawh an him loh vanga haw an ni lo tih a sawi a, “An chhungte atangin pressure a nasa lutuk a, an ngaihtuah lutuk a, haw turin an ti nasa lutuk a,” a ti. “Thudik sawi turin kan inchah,” a ti a, “An haw hunah pawh Mizoramah an him a, mahse an chhungte’n haw tura an tih avangin an haw a ni tih sawi zel turin kan inchah,” a ti. Haw-ah hian a tam ber chu zirlai, Mizorama la awm rei lo an ni tih a sawi bawk.
1997 atanga Mizorama awm tawh Ranbir Singh chuan Mizote a hriat chian thu a sawi a, “Mizoram hi peaceful state a ni a, Mizote hi hnam fel an ni tih ka hre chiang a. Ka experience atangin Mizote felzia ka hria a,” a ti. “Mizote hi hnam nunrawng an ni lo a, an cool a, an calm a, thil ngaihtuah chiang lova ti mai thin an ni lo,” a ti bawk.
Manipur-a thil thleng chu pawi an tih thu a sawi a, “Hetiang lo hian thil a kal thei a, buaina a chhuak hi a pawi kan ti. Mizote’n an tuar hi pawi kan ti em em a, tih theih kan nei si lo a,” a ti.
Manipur-ah remna awm thuai se an duh tih a sawi a, Manipur leh Mizoram chu inthian tha se an duh tih te, tun tum buaina hian Meitei leh Mizote karah thil tha lo thlen lo se an duh tih te a sawi.