Imphal atangin Mizoram mi 200 chuang an chhuak tawh

Imphal atangin Mizoram mi
200 chuang an chhuak tawh
Manipura buaina kaihhnawihah Imphal chhuahsana Mizorama thleng leh la pan mek mi 200 chuang an awm tawh a. Manipur atangin raltlan mi 600 chuang an awm tawh bawk.
Mizoram mi Imphala awm zirlai leh hnathawk leh thildang ti mi 200 chuang chuan thlawhna hmangin Pathianni khan Imphal an chhuahsan a. Imphal to Lengpui service-a Mizorama lut nghal mi 100 vel awmin, heng zinga 11 hi RIMS-a MBBS zirlai an ni. A bak zawng hi Imphal atang hian Guwahati leh Kolakta flight-a chhuak an ni a. A hranpaa Mizoram rawn pan leh tur an ni.
Mizoram Home commissioner H Lalengmawia sawi danin, state sawrkar ruahmanna in May 7 zing dar 2.16 khan Imphal atangin zirlai 50 chu Guwahati-ah thlawhna (domestic flight) in hruai thlen an ni a. Airport-ah Guwahati-a Mizoram House deputy resident commissioner hoin an lo dawngsawng. An zinga 25 hian Pathianni tlai khan bus-in Mizoram an rawn pan nghal a, haw kawngah Silchar Mizoram House DRC, Vairengte SDO (Civil) leh Kolasib bawrhsap ten a tul angin an lo dawngsawng zel a ni.
Bus-a haw nghal lo midang 25 hi chuan kawng dang dapin Mizorama rawn haw an tum nia hriat a ni .
Pathianni tlai 4.00 khan Imphal atang bawk hian Mizorama haw tur dang 81 chu thlawhna (domestic flight tho) in an chhuak ve leh a, an ni hi Kolkata-a tum tur niin, tlai dar 6.10 ah Kolkata an thleng a, airport-ah Kolakta Mizoram House joint resident commissioner hoin an lo dawngsawng ve thung. An thlenna tur pawh tihfel sak an ni a, Mizorama an rawn haw theih dan tur hi he chanchin buatsaih lai hian sawrkarin a la buaipui mek zel. Ruahman anga thil a kaltluan chuan, vawiin – May 8 chawhma dar 10.30 velah thlawhna thoin Kolkata rawn chhuahsan thei tura ngaih an ni.
Heti hian Pathianni bika Imphal atanga hruaichhuah hi mi 131 an ni a, a bak 65 la awmte hi, May 8 ah mi 37 leh May 9 ah mi 28 chu lakchhuah leh theih tumin an thlawhna chuanna tur Mizoram sawrkarin a tifel tawh a, Guwahati-a tum tur ve ve an ni.
A tira Imphala Mizoram zirlai 198 tangkhang anga chhinchhiah zinga pahnih chu anmahni remchan angin an lo chhuahsan tawh a, tuna sawrkar ruahmannaa chhuak tur chu 196 an ni tih Home commissioner hian a sawi a. In report chin chu an lachhuak kim dawn nia an ngaih thu a sawi.
Hemi rual hian zirlai ni lem lo, hnathawk leh thildang tia Imphala tangkhang, thlawhnaa Mizorama rawn lut an awm ve tho tih thu dawn a ni.
Hetihlai hian Bethesda School of Nursing Churachandpur district-a a zirlaite, state dang zirlaite an inlakchhuah zel avangin MZP Gen. Hqrs. chuan ruahmanna siamin Mizoram atanga zir mi 34 chu Pathianni khan by road-in Mizoram thlenpui an ni bawk a. Aizawl, Lunglei, Lawngtlai, Mamit leh Kolasib district khaw hrang hrang ami niin, Assam leh Meghalaya-a cheng Mizote pawh an tel a ni. MZP chuan hemi kawnga puitu, Siamsinpawlpi (SSPP) Gen. Hqrs leh ZRA chungah lawmthu an sawi a ni.