Imran Khan a inbiakna rawt hnawl

Pakistan ruling coalition te chuan Prime Minister hlui Imran Khan an inbiakna neih a rawtna chu an hnawl thu sawiin, inbiakna chu politicians ten an nei thin a, firfiak te nena neih a ni ngai lo, an ti.
Sorkar chuan Pakistan Tehreek-e-Insaf (PTI) chief chuan National Reconciliation Ordinance (NRO) dan kawng a zawng mek tiin sawi a ni bawk a.
A hma lawkin Khan chuan member pasarih awmna dinin sorkar nena inbiakna ngaihtuah ni se a ti a, chu chu inthlanpui neih hun tur chungchanga inrawnkhawmna turin a ti tia sawi a ni.
May 9 a tharum thawhna nasa tak thlen hnua PTI hruaitu lawk te thuneitu tena an vai zui hnuah PTI dinhmun derthawng hlein hruaitu tam tak te chuan an bansan zung zung tia sawi a ni.
PTI chhuahsantu langsar zingah Secretary General Asad Umar te bakah senior leader Fawad Chaudhry leh foreign minister hlui Shireen Mazari te pawh an tel bawk.
May 9 khan paramilitary Rangers tena Khan chu Islamabad high Court tualzawla an man hnuah buaina a chhuak zui a. PTI workers te chuan sipai hmunpui tam tak beiin chung zingah chuan Lahore Corps Commander’s House, Mianwali airbase leh ISISI building, Faisalabad te pawh a tel a ni.
Mipui thinrim te chuan a tum khat nan Rawalpindi a Army headquarters (GHQ) pawh an luhchhuah bawk a. Khan thlawp sang chuang te chuan man an tawk bawk.
Imran Khan party nena inbiakna neih an rawt chungchangah rorel lai Pakistan Muslim League-Nawaz (PML-N) supreme leader Nawaz Sharif chuan sorkar chuan politicians te a inbiakpui thina ti a. “Firfiak te leh sorkar paihthlak tuma martar hmun te beia buaina siam tum te a be ngai lo” tiin a sawi.
Thuchhuah a siamah Information Minister Marriyum Aurangzeb pawhin, “Sorkar beitute chu hremin an awm ang ,a inbiakna neihpui an ni lovang,” tiin a sawi bawk a, Khan chuan National Reconciliation Ordinance (NRO) neih a rawt a ti bawk a.
Thuneihna a chan lai khan military ruler Pervez Musharraf khan political party leader hrang hrang te PML-N leh Pakistan Peoples Party (PPP) hruaitu lawkte chu NRO kaltlangin an criminal case te a tihtawpsak a ti fo va. Mahse ‘rukru’ te chu NRO a pe lo tih a ni.
Marriyum chuan martar te memorial tichhetute chuan ‘martar te an tihminghliau a ni’ tiin a sawi bawk a. Khan chuan ambulance, hospital, school leh thalaite rilru tur an tuh hnuah inbiakna neih a duh a, amah nena inbiakna kalpui a ni lovang a ti bawk a.
“A party hruaitu lawk tena an chhuahsan hnuah Imran Khan chuan inbiakna neih a duhthu a sawi chauh a ni,” tiin a sawi bawk.
Marriyum chuan Khan chuan opposition te chu a sorkar laiin economy, Kashmir, national security issues, Covid-19 leh FATF issue ah te pawh a be duh ngai lo tia sawiin tunah erawh inbiakna neih a ngiat a ti bawk.
Khan chu ‘foreign agent’ tih leh ‘Tokhakhana thief’ tia sawiin Pakistan information minister chuan Pakistan sum Rs 60 billion ru bo tu nen hian inbiakna neih a ni dawn lo va, hetiang mihring hi chu court ah hruai thin niin inremna dawhkan kilpui an ni ngai lo, a ti bawk.
Minister for Poverty Alleviation Shazia Marri pawhin Khan chu May 9 a buaina chhuaka mawhphurtu tia sawiin tunah lah kutsil a tum a ni a ti bawk a.
Minister chuan mipui thinrim te chuan Lahore a Jinnah House te, Rawalpindi a GHQ te Khan thupekin an bei a ni a ti a. “A fate London hmun himah dahin he ram chhunga naupang te chu state dodal turin a fuih thung,” tiin a sawi bawk.
Marri chuan PPP chairman Bilawal Bhutto Zardari chuan political party te chu inremna a awm theih nana inbiakna nei turin hma a la a, mahse, “Imran Khan hian Bilawal hmalakna chu a hnawl a ni,” tiin a sawi bawk a. Khan a invaivungna chu amah tithlutu tiin a sawi bawk.
Jamiat Ulema-e-Islam (JUI-F) spokesperson Hafiz Hamdullah pawhin May 9-a tharum thawhna chu Imran Khan ruahman vek tiin a sawi bawk a. Military hmunpui beih chu ram chhung beihna tluk a ni tiin a sawi bawk a. Hel hmang chu inremna siampui tur a ni lo va, na taka hrem tur a ni, a ti bawk.
Hamdullah chuan Imran Khan hma lam hun chu Lung In tia sawi bawkin a chet dan vanga chhanna a siam a hun tawh a ti bawk a. “Imran Khan nena inbiakna neih tum hi fiamthu mai mai a ni,” tiin a sawi bawk.
Pakistan politics a la buai hle a, May 9 a Imran Khan party tena State chhunga hmun pawimawh hrang hrang an beihna chuan hlet a la nei zel a. Hetih lai hian Pakistan Army te chuan khauh zawkin chet an la zel bawk a. Pakistan-ah hian Army te chu thunei tak niin sorkar siam tur pawhin Army te thlawpna a hmuh ngei ngaia ngaih a ni.