Turkey-ah Recep Tayyip Erdogan bawk

Recep Tayyip Erdogan chu kum nga chuhng thuneihna chang leh tura thlan tlin a ni a. Turkey president ni rei ber tawh niin a thuneihna a sawhnghet zui zel a ni.
“Mipui maktaduai 85 te chakna a ni” tiin thlan tlin a nih hnuah Ankara-a mipui pungkhawm hmaah a sawi a.
Inlungrualna lam erawh thupuiah a neih rin loh niin a elpui ber Kemal Kilicdaroglu chu nuihsawh zuiin hei bakah hian Kurdish leader lung in tang leh pro-LGBT policy te a nuihsawh bawk.
Opposition leader chuan a chak loh thu chiang taka pawmna la sawi duh bik lo thungin “Tun hnaia inthlana felfai lo leh dik lo ber a ni,” tiin Kilicdaroglu chuan a sawi a. Rorel lai party te chuan State theihna tin a lakah an hmang tiin a sawi.
President Erdogan chuan 52% vel vote hmuin mahse mipui zahve zet chuan an thlawp map lo tih a lang chiang thung.
Turkey president inthlan hi a thawhkhatnaah chak zawk an awm loh avangin thawh hnihna neih a ni a, mahse, Kilicdaroglu chuan Erdogan campaign mumal leh tha tak chu a pha ngang lo a ni.
Ankara khawpuia mipui pungkhawm 320,000 vel hmaah Erdogan chuan, “Tu nge chak tih lam aimahin Turkey a chak a ni,” tiin a sawi a. Inthlan chu Turkish history-a inthlan pawimawh ber pakhat tiin a sawi bawk a.
A elpui ber chu sel ngalin “Bye, bye, bye, Kemal” a ti zui a, hei hi amah thlawptu tena auhla ber pakhata an neih a ni bawk.
Ankara khawpuiah hian Erdogan chakna lawm turin Turkey hmun hrang hrang atangin an kalkhawm a. A thente chuan Islamic an aupuia Turksih flag te an vai bawk a.
Turkey economic dinhmun chhe em em chuan hmun a luah lo hle. “Tumah riltam an awm lo, kan economy policy-ah kan lawm a, kum nga chhungin tha zawkin a kalpui ang,” tiin Erdogan thlawptu Seyhan chuan a sawi a.
Turkey hian economic lamah harsatna nasa tak tawk thungin inflation chu 44% vel laia sangah a chho mek a, Turkish lira chuan dollar lakah a hniam ber lai a tawng mek bawk.
Erdogan thlawptute chuan economics rilruah an dah lo, terrorist tia an sawi Kurdish te beitu a nihna chu an chhuang em em mai a ni. Pungkhawm zinga tam tak te chu Middle East leh Gulf ram atanga kalte an ni a. Erdogan chu ‘Arabs leh Muslim world thlawptu’ angin an ngai a ni.
Erdogan hi Islamist leader niin sakhuana lama conservative tena a nuam leh hrehawmah pawha an thlawp bur a ni bawk. Erdogan chu leader chak tia sawiin tunlai khawvela Sultan tiin an sawi bawk.
Erdogan chakna chu Russian President Vladimir Putin duhthusam niin khawvel ram hruaitu zinga Turkish leader lawmpuina thawntu hmasa ber a ni bawk a. Putin hian Erdogan a puihnaah Russian natural gas man Turkey-in a batsak $600 million pek tur pawh a hun a sawhsawnsak a ni.
Erdogan hi a smart a, mipui nawlpui nen inzawmna an nei tha a, media 90% a thunun bawk. Victory speech a neihah pawh ‘Turkey a chak’ a tih rualin LGBTQ community te leh opposition te chu a bei tel nghal a ni.
Erdogan-a’n kum nga chhung atana thuneihna a chan leh hnuah Turkey-ah human rights leh free speech te chu a tawmim viau zual tura ngaih a ni nghal thung a. Erdogan thlak duh mipui Turkey mipui atanga 48% vel te chu an lunghnur hle dawn a ni.
Mi tam tak te chuan Turkey chu Islamist sakhua la run zualin a kal an ring nghal a, mipui nawlpui nun zalen lo zawk a nih an ring nghal bawk.
Turkey chu inlungrual lo tak ni mekin economy chhe tak a nei mek bawk a, sawiseltute chuan Erdogan chuan chung harstana sutkian a nih theih nan chhanna engmah a nei lo an ti bawk.
Erdogan hi Turkey thingtlang lamah chuan miretheite hmangaihtu anga ngaih a ni a, tunah erawh thil a danglam chho mai thei tih chu sawiseltute thlir dan a ni.
Tun hma zawng chuan khawthlang ram te nena inlaichinna nei tha a ni a, mahse, tun hnaiah sorkar sawiseltute a vaihma danah leh a foreign policy kalpui danah sawisel a tawk nasa thung a.
Syria ram a bei a, chuvang chuan European ram te a tithinur hle a, Kurdish forces te United States in a thlawp te ep zawngin Turkish sipai te a dah bawk.
President atana thlan tlin a nih leh hnua a hna hautak ber tura ngaih chu economy siam that a ni thung a. Interest rate tihniam duai thei tur a duh economist a zawn chu a la hmu lo zel bawk a. Tun ang renga thil a kal a nih chuan Turkey currency Lira chuan a hlutna a paih zel dawn a, inflation rate chuan 85 per cent a hawlh thuai dawna ngaih a ni bawk.
Erdogan chuan a economic policy chu a chhunzawm zel tur thu sawiin analysts tena an sawiselna te chu a hnawl hmak bawk a. Mahse, analysts te chuan Turkey chuan interest rate tihsan emaw Lira sanna tura beih chu a khawi emaw zawk zawk a zawh a ngai an ti thung.