In thiahsak

Seling-a hmeithai in nawr chhiatsak chungchang chu Mizoram titi a ni a; thil thlen dan video report hrang hrang leh sawrkar lam thuchhuak pawh social media kaltlangin mipuiin kan hre zung zung a. Lungawilohna kawngzawh te pawh Seling mipuiin neiin thil phut hrang hrang an auchhuahpui bawk a. Tun dinhmunah chuan a tuartu leh thuneitute lam hian inremna an nei thei ta nia hriat a ni a, harsatna dang a thleng zui tawh lo turah beisei ta ila.
Hmasawnna kan duh a, inkalpawhna kawngpui tha hi hmasawnna thlen theihna atana pawimawh hmasa berte zing ami a ni kan ti thei ang. Kawngpui tha nei tura sawrkar hmalakna kal mek karah, eng eng emaw harsatna a thleng thin a, chu chu hmasawnna kawng zawh tan ve mek Mizoram pawhin kan tawng chho ve ta mek a ni a. Hetiang thilah hian, sawrkar thuneitute lam hian rilru fim tak an put a, fimkhur taka hma an lak thin a pawimawh hle a ni.
Tun tum thil thlengah hian, in neitu lam leh thuneitute lam indawrtawnna chu a enga pawh lo ni se, sawrkar thuneitute lam hi dan ang thlapa fimkhur taka thil kalpui tura beisei an nih laiin, tuna hmeithai in thiahsak chungchangah hian, in an thiah dawna phawrh chhuah tur, in thiahna thupek ‘Eviction Notice’ phawrh chhuah tur an nei lo nia sawi hi thil mak tak a ni awm e. Eviction Notice issue sia an lo ken theihnghilh a nih phei chuan a mak lehzual, a tih theih ang.
Kan hriat angin nikum lamah pawh khan chhim lamah, kawngpui laih avanga in thiah tura tih tawh, engkim compensation pawh tihfel vek tawh, mahse in neituten in an thiah duh loh avanga thuneitu lamin vawi tam tak order an pek tawh hnu pawha tihngaihna awm ngang lo, a tawpa in an thiahsak tak kha a awm zut mai a. |awipui South khuaa NH 54 kawngpui sial mekah te, |hualthu leh Thaizawlah te, ram laili lam deuh Serchhip district-ah Chhiahtlang, Chhingchhip, Khumtung etc -ah pawh kumin kum tir lam khan in thiat duh lo thiahsak an lo ni tawh bawk a. Khangah te kha chuan Eviction Notice an pe thlap zel a ni.
Hetiang thil a thlen tak hnua thil thar lo lang ta chu, “Mimal in thiahsakna atan bull dozer rawih Supreme Court-in a khap tawh” tih a ni. Hei hi tunhnai November ni 13-a Supreme Court thutlukna kha a ni a, ‘Bulldozer Justice’ tih a ni. State thenkhatah chuan criminal thila inhnamhnawih nia ngaihte chu bulldozer hmangin an chenna in leh bungruate an chil chhiatsak hmiah hmiah mai thin a, hei hi SC-in a khap taka chu a ni. Hetiang hi UP, Delhi, MP, Gujarat, Assam leh Maharashtra-ah te a hluar zual nia sawi a ni.
Eng pawh ni se, tun thil thlen dan hi chu, dan anga thil tihfel thlap awm si lo chunga an chenna in atanga pet chhuaka kut thlak nghal bawrh bawrh a nih avang hian, thuneitu lamin dem an hlawh a nih pawhin a mawh lo e.