India-ah sai 22,446 awm, a hma aiin tlem zawk

India-ah sai 22,446 awm anga ngaih a ni a, kum 2017-a chhiar hnuhnung bera awm zat, 27,312 aiin DNA behchhana hmanga chhiar hmasak berah hian an tlem zawk.
All-India Synchronous Elephant Estimation (SAIEE) 2025 chuan India-ah hian sai hi 18,255 leh 26,645 inkar, chawhrualin 22,446 awm angin a tar lang a ni.
Indian sorkar chuan rei tak tihkhawtlai tawh sai chhiarpui hi Thawhlehni khan a tichhuak a, kum 2021-a chhiar hna hi tan niin kum li dawn hnuah tihchhuah a ni ta chauh a ni.
Thuneitute chuan genetic analysis leh data validation avangin tihchhuah har a ni tih an sawi.
Scientist-te chuan sai ek sample 21,056 an la a, sai finfiah nan mihring hriat hran nana hman thin angin genetic coding hmangin DNA fingerprinting an ti vek bawk a. Ram ngaw km nuai 6.7 dawn tualin hmun nuai 3.1 chuangah ekna hmun hi an hmu.
Ram bial (region)-a sawi chuan Western Ghats chu sai la tamna ber niin 11,934 an awm a, North Eastern Hills & Brahmaputra phaizawlah 6,559 an awm bawk.
Shivalik Hills & Gangetic phaizawlah 2,062 awmin India laili leh Eastern Ghats-ah 1,891 an awm bawk.
Karnataka chu sai ngah ber niin 6,013 an nei a, Assam (4,159), Tamil Nadu (3,136), Kerala (2,785) leh Uttarakhand (1,792) ten an dawt.
Odisha-in sai 912 kawlin Chhattisgarh leh Jharkhand-ah 650 chuang an awm bawk a. Hmarchhak state-a Arunachal Pradesh-ah 617, Meghalaya-ah 677, Nagaland-ah 252 leh Tripura-ah 153 an awm bawk.
India laili leh khawchhak lama Madhya Pradesh-ah 97 leh Maharashtra-ah 63 awmin an ram a zauh ngaihtuahin awm an tam lo.
Tun tum sai chhiarpui hi environment ministry, Project Elephant leh Wildlife Institute of India tanghovin an thawh niin nakin zela en zui leh a hum lama hmalak a awlsam nan thiam thil changkang zawk nen an thawk.
A chhiar nan hian thawh thum – khawmuala chhiar, thlalem rinchhana mapping tih leh genetic analysis hman a ni.
A thawh hmasa berah hian forest team-in M-Stripes app hmangin kein sai awmna an chhui a. Thawh hnihnaah hian thlalem hmangin an chenna lai leh mihring hnuhma an chhui a. Thawh thumnaah hian sai ek atangin DNA anla a, sai chi hrang 4,065 an chhinchhiah a ni.
India hi Asian sai an tih bik chu khawvel puma awm 60% awmna a ni a; mahse, an chenna hi luahsak leh hmasawnna ruhrel dinna atana hman a tam avangin an tlem hret hret zel.