Bangladesh-a thawmhnaw siamna kangah mi 16 thi
Bangladesh-a thawmhnaw siamna kangah mi 16 thi
Bangladesh-a thawmhnaw siamna leh a bul chiaha bawlhlo dah khawmna in kangah mi 16 vel an thi a, mi tam takin hliam an tuar bawk a, thi zat hi an pun ngei pawh a rinawm hle niin thuneituin a sawi.
“Thawmna siamna hmun chhawng hnihna leh thumnaah ruang 16 hmuh tawh a ni,” tiin fire service director Tajul Islam Chowdhury-a chuan a sawi a, mi zawn hna thawh mek zel a nih avangin thi hi an pun a rinawm tih a sawi bawk.
Thawhlehnia kangmei chhuak hi a chhuah chhan an la hre thei lo tih Chowdhury-a chuan a sawi.
Kangmei hi an khawpui, Dhaka-a Mirpur venga chhawng sariha sang thawmhnaw siamna hmuna chhawng thumna atangin chhun lai velah a kang tan a. A bul chiaha bawlhlo chi hrang hrang – bleaching powder, plastic leh hydrogen peroxide dahna a kang kai nghal tih fire department thuneitu dang, Talha Bin Jashim-a chuan a sawi bawk.
He hmuna thawk chhungte chu an chhungte chanchin ngaihven an pung khawm a, thenkhat chuan thla an la bawk.
Chowdhury-a chuan thawmhnaw siamna hmun neitu hi an la hre chiah lo tih a sawi a, “Police leh sipaiten an zawng mek,” a ti.
Bawlhlo dahna in chu phalna nei a ni em tih zawhna chu, “Phalna chungchang hi engmah hriat kan la nei lo. Tuna kan hriat chinah chuan dan phal loh a ni ngei a. Chhui zawh a nih hnuah kan chiang thei chauh vang,” a ti.
Bangladesh-a sorkar lailawk hotu, Muhammad Yunus-a chuan chhiatna thleng pawh a tih thu a sawi a. Thuneitute chu kangmei chhuah chhan hre chhuak ngei tur leh a tuartu leh an chhungte hnenah puihna pawh pe turin a ti.
Bangladesh-ah hian in sak dan him lo leh kangmei laka himna dan zam zawm that a nih loh avangin kum tin hetiang chhiatna hi a thleng thin a, tun hma lama thleng thinah pawh mi maktaduai li vel an thawhna leh an ram sum thawh chhuah 10% zet tumtu, thawmhnaw siamna a nghawng na hle thin nghe nghe.
Kum 2013 khan Rana Plaza building-a thawmhnaw siamna hmun in chhawng sang tak chu a chim a mi 1,100 chuang an thi.
Thawhlehnia kangmei chhuak hi kang thelhna 12 hmanga thelh niin darkar thum dawn hnuah thunun theih a ni a. Bangladesh Army, police leh border guard pawhin a thelh leh chhawmdawl hna hi an thawhpui.