Tamil Nadu-in Hindi barluihna hnawl

Tamil Nadu Cooperative Milk Producers Federation, Aavin chuan Food Safety and Standards Authority of India (FSSAI) hnenah an thil siam funnaah Hindi tawnga curd sawina ‘Dahi’ tih chu an print loh tur thu an hrilh.
FSSAI te chuan an packaging ah English thumal ‘curd’ tih chu hnawla Dahi tia thlak turin cooperative leh private diary firm te chu an ngen a ni.
Chief Minister M.K. Stalin chuan FSSAI rawtna chu sawiselin, Stalin chuan ‘Hindi hmang tura inturluihna chu zauh belh zel niin curd packet mai maiah pawh Tamil leh Kannada te hnawla Hindi a ziak tura tih kan ni’ tiin a sawi a.
“Kan pianpui tawng hnawl tir min tumna nasa tak niin hetianga min turluitute hi India chhim lam atangin chatuana hnawl tur an ni,” tiin a sawi.
Dairy Development Minister S. M. Nasar chuan, “Hindi turluihna hian DMK principle bulpui panga a kalh nghal a. August thla hma ngeiin FSSAI thupek hi zawm tura tih kan ni a, kan hnawl nghal a ni. Hetah hian Hindi-in hmun a chang lo. Nikum khan kan packet-ah milk aiah ‘Doosh’ ti tura tih kan ni tawh bawk a, kha pawh kha ‘no’ kan lo ti tawh a ni,” tiin a sawi.
FSSAI tena hriattirna an chhuah hnu lawk hian BJP State President K. Annamalai pawhin thuchhuah siam nghalin Hindi thumal ‘dhahi’ hmang tura intihna chu hnuklet nghal turin a ti a. State-run cooperative milk societies te chuan an packet a regional language an hman remtih tur a ni, tiin a sawi a.
Annamalai chuan Centre-ah Prime Minister Narendra Modi kaihhruai chuan regional languages chawinun a kalpui tiin a sawi a. A tum khat nan New Ecuation Policy ah pawh naupangte chu an mother tongue a lehkha zirtir ni se a ti a ni, tiin a sawi bawk.
“FSSAI tena curd sachet a ‘Dhahi’ hmang tura an tihna hi PM Narendra Modi policy regional language chawikan nena inkalh a ni a. He notification hi hnuhkir lehnghal kan ngiat a ni,” tiin a sawi.
FSSAI chuan Tamil tawnga an thil siam kawma ‘Tayir’ tih chu an ziah an remtih zui an phal tur a ni an ti bawk a. “Mipui tena an hriatthiam sa thumal thlak a ngaihna a awm lo,” tiin Aavin te chuan an sawi a.
Aavin te hian Ambattur dairy atangin ni tin fermented product 20,000 litres vel an thar chhuak a. Heng zingah hian curd packet 500 ml, cup curds, lassi leh masala bakah probiotic buttermilk variants te pawh a tel a ni.