India-in Bangladesh nena inrina km 864 la hung lo

India-in Bangladesh nena inrina km 864 la hung lo
India chuan Bangladesh nena an inrina km 4,096.7-a km 864.482 chu a la hung lo va, km 174.51 phei chu hung ngaihna awm lo niin Union minister of State for Home Affairs Nityanand Rai chuan Thawhlehni khan Lok Sabha-ah a tar lang.
Uluberia bialtu Trinamool Congress MP Sajda Ahmed Ramri-a zawhna ziaka a chhannaah Rai-a chuan hung zawh mai theih a nih loh chhan hi ram lakah buaina a awm vang te, Border Guard Bangladesh (BGB)-in rem an la tih loh vang te, hnathawh hun a tlem vang te, lei min leh leilung rualrem lo lutuk vang te a nih thu a sawi.
“Bangladesh sorkar nen hian ramri a him theih hi kan duh ve ve a, heng zingah hian ramri hung pawh a tel a. India hian sorkar pahnih bakah Border Security Force (BSF) leh BGB pawh a tul apianga a dawr a. India sorkar chuan Bangladesh-in a hma thei anga a pawma ramri kâna pawikhawihna thleng thinte tihtawp a nih theih nan a huhova tan lak dun turin Bangladesh sorkar pawh a beisei a ni,” a ti.
BSF thuneitute chuan ramri zawng zawng hi a ram hmelhmangin a zir loh avangin hung vek theih a nih loh thu an lo sawi tawh a. Sipaite hian a ven nan sensor, CCTV camera, flood light an dah bakah ramri kân tum leh ramri kâna thil tha lo tawlh tum veng turin sipai a dah belh nasa tih an sawi.
Nikum August thlaa mipuiin nasa taka an nawr hnua Sheikh Hasina-i a bân hnuah BGB hian km 865-a thui ramri hung tur chu an phal lo thar a, hei hian hna thawh a tikhaihlak.
He inrem lohna hi director general level-a BSF leh BGB hotute tun thle tawpa New Delhi-a an inbiak hunah sawi a ni ang.