India-in US-a bungrua a thawn pung, a lak luh tlahniam

India-in US-a bungrua a thawn pung, a lak luh tlahniam
India-in US-a sumdawnna thila bungrua a thawn luh chu May thla khan 16.93%-a pungin US $ tluklehdingawn 8.83 man zet a ni a. US atanga a lak luh erawh 5.76%-a tlahniamin $ tluklehdingawn 3.62 man hu a ni thung tih commerce ministry-in a sawi.
April-May thla hniah US-a thil thawn chhuah hi 21.78%-a pungin $ tluklehdingawn 17.25 man a ni a, a lak luh pawh 25.8%-a pungin $ tluklehdingawn 8.87 man a ni tih chhinchhiah a ni.
US-in steel, aluminium leh lirthei part-ah an rama thil thawn luh man chhiah (tariff) a tihpun chungchang zawhna chu Commerce Department Special Secretary Rajesh Agrawal-a chuan India hian steel leh aluminium hi tam tham a thawn lo tih a sawi.
Lirthei kaihhnawih thilah US hian ram dang zawng zawng nena inang vekin tariff a la nia sawiin, ‘he lamah hian nghawng liantham nei khawp thil kalpui a ni lo’ tih a sawi.
Rei tak thawn loh a nih erawh chuan nghawng chu a nei ngei dawn tih Agrawal-a chuan a sawi a. Ram thenkhatin ngaihhnathiamna an hmu a nih chuan India pawh a chhawrtu a ni thei dawn tih a sawi.
US hian steel, aluminium leh lirthei bungruaah hian 25% tariff a la mek a ni.
US hi April-May thla hnih chhunga India-in ram dang a sumdawnpui lian ber pahnihna a ni.
China chu a lian ber niin India-in May thlaa bungrua a thawn luh chu 25%-a pungin $ tluklehdingawn 1.64 man a ni a, April-May chhunga a thawn luh 18.75%-a pungin $ tluklehdingawn 3.04 man a ni.
A thenawm ram atanga India-in bungrua a lak luh chu May thlaah 21.16%-a pungin $ tluklehdingawn 10.31 man a ni a. April-May chhungin 24.23%-a pungin $ tluklehdingawn 20.22 man a ni thung.
Singapore, Germany, Australia, Belgium, Korea leh Russia ramte chu May thlaa India-in bungrua a thawn chhuah a punna ram an ni bawk.
Hetih lai hian UAE, Netherlands, UK, Bangladesh, Saudi Arabia, South Africa, Italy, France, Malaysia leh Brazil-a bungrua a thawn chu May-ah a tlahniam a. Russia, Iraq, Saudi Arabia, Indonesia leh Qatar atanga thil a lak luh a tlahniam bawk.
Hetih lai hian UAE, Japan, Korea, Singapore leh Germany atanga bungrua a chawk luh a pung thung.
Economic think tank GTRI chuan India leh China-in sumdawnna an chet velna an puan chuan US-China sumdawnna an indona chuan khawvel pum a nghawng hle tih a lang niin an sawi.
China Customs-in June 10 leh India-a commerce ministry-in June 16-a an sumdawnna an tihchhuahah May thlaah khan China-in US-a bungrua a thawn zat a tlahniam hle tih a lang a, India, EU leh ASEAN ram lam hawiin a thawn tam sawt tih a lang bawk.
“India-in electronics leh khawl thil a lak luh tam ber chu China atangin a ni a, US-ah thil a thawn chhuak tam hle bawk a, hei hian khawvel pum insumdawn tawnna hi a insiam rem chak hle tih a lantir a. India tan hian Middle East-a boruak tha lo tak inmung mek hi thil duhawm lo thlen thei a ni bawk,” tiin GTRI dintu, Ajay Srivastava-a chuan a sawi.
China-in US-a a bungrua a thawn a tlem lai hian EU (12%), ASEAN (15%) leh India-ah a thawn chhuak a pung nasa hle thung a. Bungrua a thawn chhuah zat pung tam ber hi electronics (27.5%) leh khawl leh computer (22%) te an ni.