India ramah CAA hmang ta
Lok Sabha inthlan neih dawn ruaiah Ministry of Home Affairs (MHA) chuan March 11 khan Citizenship Amendment Rules, 2024 tichhuakin kum 2019-a Parliament-in a pawm tawh Citizenship Amendment Act (CAA) chu hman a ni dawn ta.
He dan hmang hian Hindu, Sikh, Buddhist, Parsi, Christian leh Jain community te, Pakistan, Bangladesh leh Afghanistan atanga India rama lutte chu India khua leh tui nihna pek an ni dawn ta a. Mahse, diltute chuan document paruk theh luh tur neiin chumi bakah India ram an luh ni chiah chiang takin an tarlang tur a ni bawk.
He Act hi December 11, 2019 khan pawm tawh niin December 12 ah President chuan pawmin hming a ziah hnan nghal bawk a. MHA chuan a hmain hriattirna a tihchhuahah Act chu January 10, 2020 atangin hman tan a ni ang a ti zet a. Mahse, rules te siam a la nih loh avangin Act chu kalpui ngaihna a awm mai lo thung a ni.
Union Home Minister Amit Shah chuan, “Heng dan hmang hian sakhuana thila Pakistan, Bangladesh leh Afghanistan a tihduhdahna tuartute chuan kan ram khua leh tui nihna an nei thei dawn ta a ni. PM Modi chuan a intiam ang ngeiin leh kan constitution siam tute thutiam Hindus, Sikhs, Buddhists, Jains, Parsis leh Christians te laka thutiam a tihlawhtling a ni” tiin a sawi.
Document thil tel tur zingah hian Afghanistan, Pakistan leh Bangladesh a thuneitu tena an pek birth certificate, tenancy records, identity papers, any licence, school or educational certificate te a tel dawn tia sawi a ni. Applicant-te chuan locally reputed community institution tena ‘eligibility certificate’ an pek an neih a ngai dawn a, chutah chuan Hindu/ Sikh/Buddhist/Jain/ Parsi/ Christian community an ni chiang ngei a ni tih lantirna a tel a ngai bawk.
Diltute chuan portal https://indiancitizenshiponline.nic.in leh mobile application CAA-2019 hmanga inziaklutin document tinte leh an thlalak te chu online-ah upload-in chutah an dilna te chu security agency ten background check an neih hnuah kalpui zui zel a ni dawn a ni.
Khua leh tui nihna dilna chu online a kalpui tur niin empowered committee te chuan district-level committee kaltlangin enfiahna an nei ang. Empowered committtee hi State tina Director (Census Operations) in a kaihruai ang a, committee-ah hian Intelligence Bureau, Post Master General, State or National Informatics Centre officer te bakah Department of Home leh Divisional Railway Manager aiawh te chu invitees angin an tel bawk dawn a ni.
District-level committee chu Senior Superintendent or Superintendent of Post in a kaihruai thung ang a. Diltu chuan an nu leh pate date of birth finfiahna an thehluh ngei ngei a ngai dawna chumi atan chuan passport emaw birth certificate pawm a ni ang. passport emaw birth certificate an nei lo a nih chuan an hming, address leh an nu leh pate nationality an thehlut mai tur a ni thung.
CAA atana Cut-off date chu December 31, 2014 tih a ni a, India khua leh tui nih diltu chuan Section 6B of CAA, 2019 duh dan angin passport, visa, slip Census enumarator tena an pek, PAN card, electricity bill, insurance policy copy an theh luh a ngai dawn a ni.
CAA chuan heng community paruk mi leh sate hi Foreigners Act, 1946 leh Passport Act, 1920 hmanga criminal case siamsak a khap bawk a.
Applicant te chu thuneitute hnenah anmahni ngei inlanin rinawmna thutiam an lak a ngai bawk a, an tiduh lo a nih chuan district-level committee te chuan an dilna chu an hnawlsak thei bawk ang.
Third Schedule hnuaia naturalisation diltute chuan an statement siam a dik ngei a ni tih finfiahna affidavit an thehluh a ngai thung dawn a ni. India khua leh tui tihna hi birth, descent, registration, naturalisation emaw incorporation of territory hmanga neih theih a ni.
CAA hian northeast pumpui deuhthaw a huam lo thung a. Assam, Meghalaya, Mizoram leh Tripura a tribal area te chu Sixth Schedule to the Constitution hmanna a nih avangin a huam lo va. Arunachal Pradesh, Mizoram, Nagaland leh Manipur te chu CAA hian a huam tel lo hrim hrim a ni.