India squad la thlitfim leh turah Mizo pali

India squad la thlitfim leh turah Mizo pali
Vietnam rama Tri-Nation friendly tournament-ah India chuan Vietnam (October 9) leh Lebanon (October 12) a hmachhawn dawn a, he mi atana squad fawmkhawm mekah Indian senior men’s team head coach Manolo Marquez chuan Thawhtanni khan India camp zawm turin player 26 a thlangchhuak phawt a, an zingah hian Mizo footballer pali telin, player 23 awmna final list-ah an inhamtang zui zel dawn em sawi theih a ni rih lo.
Squad hmasaa Mizo player hming langte chu Lallianzuala Chhangte (Mumbai City FC), Lalengmawia Ralte (Mohun Bagan Super Giant), Edmund Lalrindika (Inter Kashi?) leh Lalrinliana Hnamte (Chennaiyin FC)-te an ni.
He friendly tournament hi October FIFA International Match Window laia khelh tur niin, match zawng zawng hi Nam Dinh khuaa Thien Truong Stadium-ah vek khelh a ni ang.
Blue Tigers squad la thlitfim leh turah hian boss Marquez chuan hmel thar pahnih a senglut a, chu’ng mite chu Lalrinliana Hnamte leh Aakash Sangwan-te an ni.
Indian football team head coach-in promising player pahnih a kohte hi International football-a India squad tha tichak thei tura theihna nei tha ve ve niin, tualchhung league lamah an khel mar tha ve ve a, ram tana an theihna phochhuak turin hun remchang an hmu chhunzawm tura ngaih a ni.
Mizo tlangval Rina Hnamte hian tun season-ah Jeje Lalpekhlua hnungzuiin Indian Super League (ISL) champion hlui Chennaiyin FC a zawm a, South Indian team tha tan hian a khel tha mar hle a, tun dinhmunah tak phei chuan Indian football-a midfielder la naupang zingah hmalam hun nei-eng berte zinga pakhat a ni pha hial a, tun season ni lo a hmalamah pawh khan domestic league lamah Indian football ngaihventute hriat a lo hlawh tawh a ni.
Kum naupangte la ni mah se ISL-ah hian a theihna a phochhuak tawh a, a hmathlir (vision), a thawhrim dan (work ethic) leh a thiamna (technical prowess)-te hian fans leh coach-te a hip hle a ni.
Kum 21 mi lek la ni chungin Mizo player hian club tan game 50 chuang khel tawhin, Chennaiyin tan goal hnih a thun tling tawh a; Tamil Nadu club a zawm hma hian Kolkata club ropui pahnih East Bengal leh Mohun Bagan thuam a inbel pha ngat tawh a, hei hian a chimchin hniam lohzia chu a pholang chiang mai awm e!
Tunah national squad-a hmun nghet chang thei turin rahbi hmasa a chuangkai a, international stage-a a theihna pholang turin final list-ah a tel ngei a ngai.
National team-a mithar dang Sangwan hi chu tawnhriat ngah tawh niin, defender kum 28 mi hian season liamta khan Chennaiyin FC tan khelin, tunah FC Goa tan ISL a khel mek a; club level-ah match 115 chuang khel tawhin, goal thum a thun tawh bakah assist vawi 15 a nei tling tawh bawk.
A position pangngai chu left-back ni mah se goal nawr kawngah pawh a thawhhlawk thin a, box chhunga a cross hlauhawm tak tak avangin a pawlte’n goal khiti zat khi an khung phah tawh reng a ni.

India prabable squad

Goalkeepers: Gurpreet Singh Sandhu, Amrinder Singh, Vishal Kaith.

Defenders: Nikhil Poojary, Rahul Bheke, Chinglensana Singh Konsham, Anwar Ali, Aakash Sangwan, Subhasish Bose, Asish Rai, Mehtab Singh, Roshan Singh Naorem.

Midfielders: Suresh Singh Wangjam, Lalrinliana Hnamte, Jeakson Singh Thounaojam, Nandhakumar Sekar, Brandon Fernandes, Anirudh Thapa, Liston Colaco, Lalengmawia, Lallianzuala Chhangte.

Forwards: Edmund Lalrindika, Farukh Chaudhary, Manvir Singh, Vikram Partap Singh, Rahim Ali.