Indonesia khawpuia pisa kangah mi 22 thi

Indonesia khawpui, Jakarta-a pisa atana luah in chhawng sariha sang kangah mi 22 an thi tih police-in an sawi.
Thawhlehnia kangmei chhuak hi thelh mih thuai a ni a, a hnuah ruang kang chhe tawh tak tak hmuh zui niin tute nge an nih finfiah turin damdawi inah lak nghal an ni tih Central Jakarta police hotu, Susatyo Purnomo Condro chuan chanchinbu mite hnenah a sawi.
Kangmei hi chhawng khatna atangin chhun lai velah a chhuak a, a chung lam a kang kai chho ta niin Condro-a hian a sawi.
In hi Japanese firm Terra Drone Corporation hnuaia Terra Drone Indonesia-in an luah niin an company hi lo neihna thil atanga thil laih chhuahna hmun thlenga miin drone hmanga van sang atanga hmunhma zir chiang tura an chhawr thin an ni.
Condro-a chuan kangmei chhuah lai hi chhun chawlh lai niin thenkhat chu pawn lamah inhnawh puarin an chhuak a, thenkhat erawh a chhungah an inei puar lai a nih thu a sawi.
Kompas TV-in video a tihchhuahah chuan kang thelhtuten a chhunga mite lak chhuah tuma an beih lai a lang a, thenkhatin ruang tuamna ip (body bag) an keng chhuak lai a lang bawk a. Thawktu thenkhat chu in chung sang atangin leilawn hun sawn theih hmangin an tlan chhuak bawk.
“Police forensic laboratory team-in a chhui hna thawk turin a hmun hi an thleng tawh,” tiin Condro-a chuan a sawi.
“Tuna kan hriat theih chinah chuan drone-a hman battery atangin kangmei hi a chhuak a; mahse, a kan chhan tak erawh la chhui ngai a ni rih,” a ti a. Police-in sumdawnna neitu leh in neitu pawh thu an zawt fiah dawn tih a sawi.
Terra Drone Co chuan ngaihdam dilna thu an chhuah a, tual chhung mi leh anmahni dawrtuten hrehawmna nasa tak an tawk chu pawi an ti a, an sumdawnnain a tawrh dan pawh an chhut ve mek tih an tar lang.
Chawlhkar hnih dawn liam ta, November 26-ah khan Hong Kong-a in chhawng sang ding khawmah kangmei a lo chhuak tawh a, thuneitute chuan Thawhlehni thleng khan mi 160 an thi tawh tih an sawi.