Indonesia president atan Prabowo Subianto

Indonesia defence minister Prabowo Subianto chu president a ni mai dawn a, Indonesia inthlanah chakna a chang a ni.
“He hnehna hi Indonesian tinte tan a ni” tiin amah thlawptu pungkhawmte hmaah a sawi a. Vote chhiar chinah sipai general hlui hian 57% chuang vote hmu in chakna a chang chianga ngaih a ni a. Hei vang hian second round run-off tul lova ngaih a ni.
Kum 72-a upa Prabowo hi sawi hlawh zet mai niin Indonesia chu tun hmaa authoritarian sorkar a lo neih tawh ang dinhmunah a din leh hlauhna a awm nghal a. Dictator General Suharto hnuaia special forces commander hlui niin Suharto makpa a ni bawk a, a hunlaia human rights bawhchhe nasa tia puh a ni bawk.
“Kan lawm em em rualin kan chapo emaw intivei tur a ni lo va, inngaitlawm takin kan awm tur a ni a, he hnehna hi Indonesia mipuite hnehna a ni” tiin Prabowo, Advanced Indonesian Coalition hotu chuan a sawi a.
Thusawina a neihah president lo ni tawh te hming pawh sawi langin president kalchhuak tur joko Widodo policy te chu an kalpui chhunzawm tur thu a sawi bawk.
Prabowo hian a hma in Widodo hi lo khing tawhin tum hnih a hneh lo tawh a, Widodo chu Indonesian mipuite duh rawn em em a ni a. Mahse term hnih a chelh zawn tawh avangin Indonesian mipui tena kohduat nana ‘Jokowi’ an tih mai Widodo chu president a ni zui thei tawh rih lo a ni.
Voters tam tak te chuan vote turah an buai tiin an sawi a. “Tun inthlan danglamna em em chu duh ber thlan nalh tur an awm lo a, chuvangin voters te chuan a chhe ber lo tura ngaih kan vote mai” tiin Jakarta a sumdawng pakhat chuan a sawi a. Chutihrual erawh chuan Germany a cheng Indonesian pakhat chuan ‘Indonesia in tuna a mamawh ber chu mi chak a ni’ tia sawiin sipai general hlui in thuneihna a chang tur chu a lawm thung.
Prabowo elpui ber pahnih chu provincial governor hlui pahnih Ganjar Pranowo leh Anies Basweden te an ni a. mahse, an pahnih hian 17% leh 25% vel ve ve in Prabowo hi an phak lo a ni.
Prabowo Subiato hian zei takin social media campaign kalpuiin amah chu sipai khauh leh chak atangin hruaitu kum upa fim tawh angin a inlantir a ni. Chutak chu Indonesian thalai tam ber tun hmaa Prabowo chanchin hrethuk lem lo te lakah chuan a tla na em em thung.
Indonesian elite special forces commander a nih laiin East Timor awp laiin human rights bawhchhe nasa a puh niin Suharto rorel lai kum 1990 chhovah students activists te rubo leh sawisaa puh a ni a. Mahse, chung puhna te chu pha thungin thubuai siamsak emaw thiamloh chantirin a awm lo bawk.
Prabowo tlin theih nana thawh hlawk ber pakhat chu president ni lai Widodo niin, Widodo fapa upa ber Gibran Rakabuming Raka chu Prabowo running-mate a ni bawk.