Industrial estate huamchhunga dan loa awm leh thil tih thin tihtawp tum

Industrial Growth Centre (IGC) Luangmual leh Export Promotion Industrial Park (EPIP) Lengte huamchhunga dan loa awmte leh dan loa hmalakna awmte dan anga chinfel tumin ruahmanna siam a ni.
Industries minister F Rodingliana leh Land Revenue & Settlement minister B Lalchhanzova hoin Ningani khan a kaihhnawih sawrkar hotute an thukhawm a. Industries minister chuan sawrkarin industry din duh tak tak thalaite a ngaipawimawh a, industrial area-a puana dan loa awmte chungah khauh zawka dan anga hma lak a tul tih a sawi. Industry din nana sawrkarin plot allotment a pek, sawrkar pek anga hmang lo te pawh thangthar, industry din duhte hmakhua ngaia an plot cancel sak thlenga hma lak a tul dawn tih a sawi a ni.
Revenue minister B Lalchhanzova pawhin department pahnih inkarah thawhhona tha leh tanrualna a awm a pawimawh, tiin, inter-departmental collaboration tha leh convergence network tha tak hnuaia thawh ho zel a tul tih a sawi a ni.
Thutkhawmah hian village council-te chu ram pe theitu an nih loh avangin VC pass-in ram neitu nihna a pe lo tih sawi a ni a. Hemi lamaa sawrkarin order leh office memorandum a lo chhuah tawhte thlir ho a ni. Industrial area-a VC pass awm chu dan dinglai anga chingfel tura hma lak nise, tih a ni.
Industries department-in industry din nana plot a pek zingah a nihna tur anga hmang lo leh hma la tha lo an awm a, chu’ng zinga engemawzat chu an plot cancel a ni tawh tih sawi a ni. pek tawh, pek an nih anga hmang lo leh hma la lote chungah ‘Industrial Area (Management, Regulation and Control) Act 2008’ zulzuia hma lak zel a ni dawn tih sawi a ni bawk.
Chak zawka hma lak a nih theih nan Commerce & Industries leh Land Revenue & Settlement officer-te telna Joint Task Force din an rel a. Task Force hian IGC Luangmual leh EPIP Lengte ram chhunga harsatna awmte enfiahin, heng ram chhunga pass nei nia inchhalte pawh an pass dinhmun uluk takin fiah a ni anga, dan anga hma lak dan tur duan a ni ang. Task Force hmalakna leh rawtna hi department pahnih hian thlir zui zelin lungrual takin hma an la chhunzawm zel ang.
“He hmalakna hi thangtharte leh ram tana hmalakna bul tanna pawimawh tak a ni a; department official-te pawhin rawngbawlna rilru pua dik tak leh huaisen taka hma la turin ka duh a ni,” F Rodingliana hian a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More