Industry tih hmasawnna tur kalpui tan

India hmarchhak state-ah industry hmanga economy hmasawnna chak zawk a thlen theih nana sawrkar laipui ruahman, UNNATI (Uttar Poorva Transformative Industrialization Scheme) 2024 chu Thawhtanni khan Commerce & Industries minister F Rodingliana’n Aizawlah a tlangzarh.
Industry hmasawnna tur sawrkar laipui scheme-ah hian a kaihhnawih service hrang hrang tan hmasawnna a thlen a beisei tih Industries minister hian a sawi a. State sawrkarin Handholding Policy a kalpui mek leh tunhnaia Strategic Investment Plan hnuaia MSME Elevate Mizoram (MEMiz) Scheme a siam leh hmalakna dang nen a remchan dan ang zela inzarzawmin, industry neitute tan hmasawnna tha tak a thlen a beisei tih a sawi a ni.
Eizawnna atan sawrkara innghat ngawt lo thangthar thiam leh taima tak tak Mizoramin a nei tawh tih sawiin, tunhma lamah Mizorama industry neitute zingah an eizawnna bul tan leh tih hmasawnna tur loan an puk chu a nihna tura hmang lo leh rul tha lo an awm thin a, chu chuan industry thanna tur a tihthuanawp tih a sawi.
“Tunah chuan hmasawna hlawhtling tak tak duh tan sawrkarin theihtawp a chhuah dawn a. Handholding Policy hmangin industry tihhmasawn a ni dawn,” F Rodingliana hian a ti a. Sawrkar hna chu ‘public service’ a nih angin, handholding policy leh policy dang dang pawh tangkai thei ang bera chhawr a nih theihnan official-ten inhawng taka kalpui turin a chah bawk.
UNNATI scheme-a North Eastern Region states nodal officer Dr Karampaul Singh chuan he scheme thar hi a sawifiah a. Unnati 2024 chungchang inzirtir nghal niin, health care (hospitals/ diagnostic centres adt), food & beverages (horticulture, agriculture, food entrepreneurs adt), tourism sector (hotels/ home stays) leh education (LESDE/ vocational & digital /IT & ITES) lam inhrilhhriat a ni.