Infantino dinhmun a derthawng

Khawvela football thuneitu sang ber The Fédération Internationale de Football Association (FIFA) President ni mek Gianni Infantino dinhmun a derthawng zual zel a, inthlan hmaa bang thei dinhmunah a ding.
A bul tanna
FIFA President ni mek Gianni Infantino hi kum 2000 atang khan Europe khawmuala football thuneitu Union of European Football Associations (UEFA)-ah a inhmang tan a. Kum 2004 atangin Director of UEFA’s Legal Affairs and Club Licensing Division nihna a chelh tan. Kum 2007 khan Deputy General Secretary a ni a, kum 2009 atangin Secretary General a ni zui leh. UEFA ah khel thei ram 16 atanga 24 a tihpun leh UEFA Nations League khelh a nih theih nan a thawhhlawk hle.
UEFA lama a inhman lar lai hian FIFA President ni mek Sepp Blatter chu a nihna chelh zui tlak lovin a awm. Sepp Blatter hmunruak hi Issa Hayatou-a’n inthlanpui neih hmain a luah lailawk. Inthlan neih a ni a, UEFA in an thlawp Gianni Infantino hi President-ah February 26, 2016-ah thlan tlin a ni. Kum 2019-ah thlan nawn leh a ni a, full term a hman zawh hnuin kum 2023 khan thlan nawn leh a ni a, tun thlengin President a la ni mek.
World Cup a tel thei ram 32 atangin 48-ah a tipung a, World Cup khel thei an tam tak vangin ram tam tak chu Infantino chungah an lawm a, CONMEBOL(South America), AFC (Asia), CONCACAF leh CAF (Africa) khawmualten Infantino hi an thlawp em em a, March 2023-a President thlan hunah awlsam taka tling nawn leh thei tura ngaih a ni.
A che pelh tan
Term puitlingin term hnih chhung President a ni tawh mah se Infantino hi a dinhmun a nghet tawk viau a, World Cup 2026 khelh hma thleng kha chuan inthlan awm leh turah pawh a tlin leh ngei a rinawm a. A khingpui tur awm ang pawh an awm meuh lo zawk. A dinhmun a ngheh tawk viau laiin a che pelh tan a, World Cup 2026 a zwh meuh chuan a term hmang pawh hmang zo lova bang tura nawrna hial a tawk ta hial.
Kan hriat tawh angin World Cup 2026 chu ram pathum; USA, Canada leh Mexico ten an thleng. WC 2026 hi a thlengtu pui ber chu ram ropui USA an ni. USA in an thleng a, an President Donald Trump leh kawng engkima inrawlh a, tel ve vek tum chi a lo ni a, thil zep thei lo tak a ni tel bawk. FIFA-ah Donald Trump a inrawlh thuk lutuk niin a lang ta a, Fifa President Infantino rinhlelhna leh duhkhawplohna a awm tan.
WC 2026 thlengtu USA Presdient Donald Trump hi hi FIFA chuan ni danga an la tih ngai loh angin ‘Peace Prize’ an hlan mauh mai a, hei hian sawizui a hlawh hle. Donald Trump hnena Peace Prize hlan a nih tur hi FIFA Committee te pawhin an hriatpui mang lo nia tarlan a ni a, mi pali/nga bakin an hre lawk lo niin tarlan a ni. Indona hmun tam taka USA an inrawlh dante enin Trump hnena Peace Prize hlan a ni ngawt mai hian mak tih a hlawh a, ‘FIFA in Donald Trump an tlawn’ an ti hial nghe nghe.
World Cup khelh a ni a, hydration break neih a niin sawizui a hlawh leh viau bawk. Footballer ropui Diego Maradona khan USA in World Cup a thlen tur hi duh lovin a lo sawisel lawk tawh a. “USA-ah a thlen chuan hun puitling hi hun then hran pali-ah thenhran (quarter li ah) a ni ang,” tiin a lo sawi lawk tawh. Maradona sawi lawk ang ngeiin US-a infiamna lar Base-ball a an tih angin World Cup 2026-a match zawng zawngah khan hun then hran pali (4th quarter) a awm vek. A hmingah ‘Hydration break’ tih ni bawk mah se an tum bulpui ber chu sumdawnna (advertisement) a ni. Hydration break hian sawisel a hlawh a, inhnialna a chawkchhuk zui nasa hle nghe nghe.
‘FIFA in Donald Trump an tlawn’ an tih lai mekin thil lian leh pawi zawk a thleng zui leh. Last 32-a USA leh Bosnia and Herzegovina an inkhelh tumin USA striker Folarin Bolugan hnawhchhuah a ni. Direct red card hmu a nih vangin Bolugan hi khelh hnih tal khel thei lo ngei tur a nih laiin USA President a inrawlh a, a hremna tawrh tur hi tuar rih lova, suspend rih turin FIFA a ngen. FIFA a ngen thu leh a ngenna an tihhlawhtlinsak hnuin FIFA president hnena lawmthu a sawina social media-ah a post hial bawk.
FIFA hian chawpchilh takin Balogun chungchang hi an ngaihtuah a, Donald Trump ngenna angin hremna an tawrh tir rih lo. Last 32 a Red card hmu Folarin Balogun hian last 16-ah Belgium a hmachhawn zui leh nghal zat. He thil thleng meuh hi chuan football ngainatute a tilungni lo leh zual hle a, FIFA President Infantino ngei pawhin sawisel a tawk nasa zui hle.
Sawisel a tawh nasat em vangin Infantino hian Balogun hremna chungchangah a inrawlh loh thu a sawi tak naa pawmsak erawh a hlawh lo. Donaldo Trump a lo pau nasa tawh mai bawk si a, awihsak a har ve bawk. Chawpchilh taka thutlukna lian leh mak tak siam tur chuan thuneitu sang ber President a inrawlh a nih ngawt loh chuan khati khawpa rang leh mak khan thutlukna an siam a rinawm tlat lo.
World Cup vanga sawisel leh duhkhawp lohna lian tak a awm hnuin FIFA President Gianni Infantino chuan football ngainatute duh loh leh zual mimal hnena FIFA chanvo 20% zet hralh a tum leh ta zel.
FIFA in 20% hralh a tumna hi World Cup buaipuitu tur bik FIFA Forward Enterprise (FFE) din a ni. FFE hi an din fel a nih chuan World Cup kaihhnawiah thil pawimawh hrang hrang an buaipui ang a, an ruahmannate FIFA in enpuiin a pawmpui thin ang. FFE hi din a nih chuan World Cup kaihhnawiha hlawkna te chu FIFA in 70% – 80% a chang ang a, company hian 20% – 30% hlawkna an chang ve thung ang.
FFE hi din ta se investor tura ngaih Joshua Kushner chu Donald Trump-a makpa Jared-a laina hnai a lo ni leh ta zel a, hei hian UEFA leh football ngainatu tam tak ngaih a titha lo leh zual a. FIFA-ah Donald Trump inrawlh thukzia tilang chiang leh zualtuah ngaih a ni tel bawk.
Infantino hian FFE din tuma ruahmanna awm hi tihhlawhtlin a tum hle a, ann ruahmanna a tlang a nih chuan FIFA member hnenah US Dollar 40million an sem theih tur tur a sawi hial. FIFA member te hnenah tawktarh tha tak neiin thlem thiam viau mah se football hmangaihtute a hmin thei ta ngang lova, a tlang dawn chuang loh vangin an ruahmanna hi an hnukdawk ta hial nghe nghe.
A puak ta
FIFA President Gianni Infantino lakah duhkhawp lohna inmung mek chu a puakchhuak ta nge nge a, bang tura nawrna hial a tawk ta.
Infantino hian FFE din a tum vangin a lam tang tam tak a hloh a, thlawptu a nei mumal tawh lo. FFE duh lova thawm nei ring ber chu khawmual thil tithei ber UEFA an ni a, UEFA hian FFE a tlang a nih chuan World Cup a an tel ve loh tur hu an sawi hial a ni. UEFA in na taka an dodal hnuin Asia khawmualin an duh loh thu an sawi a, Concacaf pawhin an dodal ve leh bawk. Heng khawmual te tel lo hi chuan a tlang thei lo.
FIFA Forward Enterprise (FFE) din an tumna an hnuhdawh hnu pawhin thu a la tap mai lo va, UEFA chuan FIFA President Infantino hi bang tura an duh thu ans awi ta hial. FIFA President hi March 2027-ah thlan a ni dawn naa inthlanna neih hmain Infantino hi bang turin an nawr a, a bang lo a nih pawhin rintawk lohna motion put luha phar thlak dang kawng an dap zui hial.
Khawmual anga Infantino duh lohna lian tak a awm lai mekin Football Association of Wales chuan President ni leh tura Infantino an thlawpa an hnuhdawh thu an puang a. Wales hi ram mal anga Infantino thlawpna hnukdawk hmasa ber an ni a. Football hmuchhuaktu Football Association (England – FA) pawhin Infantino an thlawpna an hnukdawk dawn bawk.
Infantino duh lohna thawm ring takin a puak ta a, President-ah a tling leh kher ang em tih a chiang ta lo hle. UEFA hi Infantino dodaltu langsar tak an ni a, anni in thawm an neih len viau lai hian FFE chungchanga Infantino dodaltute hian President-ah hnawl kher ang em tih a chiang chuang bik lo thung.
Tunge President thar ni ang?
President ni mek Gianni Infantino hian President a la chuh thei a, a chuh zui leh ngei pawh a rinawm. Chu leh ta se a tling zo ang em? Tling lo ta se tunge Presidenbt thar ni ang chu zawhna awm mek a ni.
Football a khawmual thil tithei ber UEFA chuan Infantino an duh tawh loh vangin President tur an zawng a, PSG president ni mek leh Europe club te inthlun khawmnaa President ni mek bawk Nasser Al-Khelaifi chu FIFA President chuh turin an nawr niin tarlan a ni. FIFA president nih theihna hun tha nei bawk mah se Nasser Al-Khelaifi hian FIFA President nih a chak ngai loh thu leh nih a tum ngai loh thu a sawi a. President chuh a tum loh thu a sawi niin tarlan a ni tho bawk.
FIFA President thar ni tura rinkai zual zingah Africa khawmuala president ni mek Victor Montagliani chu rinkai ber a ni mek. Ani bakah hian Asia khawmual AFC a President ni mekSheikh Salman bin Ebrahim Al Khalifa chu rinkai zual zingah a tel bawk. Infantino paihthla tur chuan khawmual liana hruaitute inchuh buai lova an inkenthiam a, an insiamrem thiam a pawimawh dawn.
President thlan dan
FIFA President hi mi pahnih aia tamin an chuh a nih chuan vote thlak a ni ang a, vote hmu tlem ber a tla phawt ang. Vote hmu tam zual atangin thlan that leh tur a ni a, vote hmu tlem ber an tla zel ang. Pahnih chauh an awm hunah vote 106 hmu tling zawk zawk tlingah puan an ni ang.
FIFA member ni 211 an ni mek a, President a tling tur hian a zatve aia tam hret vote 106 hmuh a ngai. (Milem – FIFA President chuh tura rin Victor Montagliani)