Infiammite tana sawrkar hna hauh bikah hma la tha vak lo – Sports minister

Infiammi mibikte tana sawrkar hna hauhsak chu department lamin an bawhzui tha vak lo tih Sports minister Robert Romawia Royte chuan a sawi.Sawrkarin a kalpui mek ‘sports person-te tana sawrkar hna zaa 5 hauhsak’ tih ah, Group B non gazetted hnuailam hna ngheta direct recruitment-ah sports thiambikte pualin hna awm zawng zawng atanga zaa 5 hauhsak tur a nih laiin, department hrang hrangah hei hi zawm a ni lem lo tih minister hian a sawi.
MNF sawrkarah sports-in hma a sawn nasa a, a intiam angin sports chu industry status pek a ni tawh tih Robert Romawia Royte hian a sawi. MNF manifesto tihlawhtlingin Mizoramin a la neih ngai loh ‘Sports Policy’ tha tak an sawrkar atanga kum khat ralhmaa an peihfel thu leh he policy zulzuia DPR an siam thin avangin an hlawhtlin nasat thu a sawi a ni.
India rama a vawikhatna atan Mizoram sawrkarin sports chu industry status a pek thu sawiin, hei hian kawng tha tam tak a hawng a; private company leh sumdawngte tan sports hmasawnnaah kawng zau zawk a hawng tih a sawi.
Mizoram chu India rama PMJVK hnuaia a tha thlan chhuah pathum zinga a tel thu minister hian a sawi a. PMJVK chu a department chan hrang hranga officer-te nen uluk taka an zirchian thin thu leh hamthatna awm thei an ngaihven thin thu sawiin, “Endikna hrang hrang a paltlang hnu ah dan ang takin sum hi hmuh thin a ni a. Kan sum hmuh hi a hmanna tur dik takah kan hmang thin,” a ti a. PMJVK sum an hmuh danah thil hrechiang loa puhmawh tum an awm thin tih a sawi.
State budget tibuai loa sawrkar laipui atanga a tam thei ang ber direct funding hnuhchhuah chu minister a nih tirh atanga a thil tum a ni tih sawiin, a department chan tih hmasawn nan theihtawp chhuaha hma a lak thu leh hna tam tak a thawh thu a sawi bawk.

Minister sawi thenkhat
# Lehkha zir chunga sports thei bikte tan training-na tur sports school panga dinna atan PMJVK atangin cheng nuai 16751.70 an hmu a. Sports school hi Mamit, Kawrthah, Lawngtlai, West Phaileng leh Lunglei ah sak a ni.
# Thalaite duh leh mamawh phullem field chu tun sawrkar chhungin 30 phah hman an tum a. Lunglei, Lawngtlai leh Mamitah sports complex sak mek a ni bawk.
# Basketball leh Volleyball court sakna tur state budget pawn atangin cheng nuai 3700 hmuh a ni a. Standard facility vekin court 100 chuang sak tura ruahman niin a tam zawk zawh a ni tawh.
# Lunglei Ramthar leh Lengpuiah FIFA leh AIFF pawmpui futsal ground sak mek a ni
# Hockey Synthetic Ground pahnih – Lunglei leh Muallungthu (Aizawl) ah sak a ni.
# Lengpuia moto-sports racing track siam nan REC (Ministry of Power) atangin cheng nuai 750 sanction hmuh a ni a. SASCI atangin cheng nuai 800 hmuh a ni a, hna hi zaa 75 vel zawh a ni tawh.